ಮಳೆ ಮತ್ತು ನೆನಪುಗಳು

06/08/2021 - ಕ್ರಾಂತಿಧ್ವನಿ

ಆಹಾ ಎಂಥ ಸೊಗಸು ಮಳೆಯ ಮಲೆನಾಡು
ಜೀವನದಿ ಒಮ್ಮೆಯಾದರೂ ಇದನು ನೋಡು
ಇಲ್ಲಿದೆ ಸಾವಿರ ಸವಿಸವಿ ನೆನಪುಗಳ ಜಾಡು
ಮಲೆನಾಡು ನನ್ನಯ ಒಲುಮೆಯ ಗೂಡು

ಕೆಸುವಿನ ಎಲೆಯ ಮೇಲೆ ಮುತ್ತಿನ ನೀರ ಹನಿ
ನಡು ರಾತ್ರಿಯಲೂ ಕಪ್ಪೆಗಳ ಕರಕರ ದನಿ
ಮಳೆಯಲಿ ಹಸಿರು ಹಾಸು ಹಾಸಿದ ಅವನಿ
ಆಹಾ!! ಇದು ನನ್ನ ಮಳೆಯ ಮಲೆನಾಡು

ಮರದ ಮೇಲಿನ ಸೀತಾಳೆ ಹೂವ ಸೊಬಗು
ಸುತ್ತಲೂ ನೆಟ್ಟ ಗದ್ದೆಯ ಹಸಿರಿನ ಮೆರಗು
ಧೋ ಎಂದು ಕೂಗುವ ಜಲಪಾತದ ಬೆರಗು
ಆಹಾ!! ಇದು ನನ್ನ ಮಳೆಯ ಮಲೆನಾಡು

ಕಾಲಿಟ್ಟರೆ ಮಿಜಿಗುಡುವ ಉಂಬಳದ ಕಾಟ
ಸಾಲಾಗಿ ತೊಟ್ಟಿಕ್ಕುವ ಮುತ್ತಿನ ಹನಿ ನೋಟ
ಹಳ್ಳಿಯ ಮಕ್ಕಳ ಮೋಜಿನ ನೀರಾಟ
ಆಹಾ!! ಇದು ನನ್ನ ಮಳೆಯ ಮಲೆನಾಡು