ವೇದನೆ

ಮಾಗಿಯ ಚಳಿಗಾಗಿ ಕಾಯುವ ಭುವಿಯಂತೆ..

ಮಂಜಿನ ಹನಿಯ ಸ್ಪರ್ಶಕಾಗಿ ಕಾದ ಇಳೆಯಂತೆ..

ಬಿಸಿಲ ಬಿಸಿ ಅಪ್ಪುಗೆಗೆ ಕಾದ ವಸುಂಧರೆಯಂತೆ..

ಮುಂಗಾರು ಮಳೆಗಾಗಿ ವಿರಹಿಸಿ ಕಾಯುವ ಧರೆಯಂತೆ..

ನಿನ್ನ ಆಗಮನಕಾಗಿ ಕಾದಿರುವೆ ಓ ಗೆಳೆಯಾ..

ಮನದ ಭಾವನೆಯ ಹೊತ್ತ ಸಂದೇಶ ರವಾನೆ..

ಕಣ್ಣು ಮುಚ್ಚಿದರೆ ಕಾಡುವ ನಿನ್ನ ಕನಸುಗಳು..

ಕಣ್ಣು ತೆರೆದರೂ ಬರಿ ನಿನ್ನ ಹಗಲುಕನಸುಗಳು..

ಮನದಿ ನಿನ್ನ ನೆನಪಿನಲೆಯ ತೊಯ್ದಾಟ..

ಇದೆಲ್ಲವೂ ಸಾಕಾಗಿದೆ ಓ ಗೆಳೆಯಾ..

ಸಾಕಾಗಿದೆ ಈ ಸಂಘರ್ಷ, ನೀಡು ನಿನ್ನ ಹಿತ ಸ್ಪರ್ಶ..

ಕ್ಷಣ ಕ್ಷಣವೂ ಬೇಕಾಗಿದೆ ನಿನ್ನ ಸಾಂಗತ್ಯ..

ಸವಿಯುವಾಸೆ ಬಾಹುಬಂಧನದ ಲಾಲಿತ್ಯ..

ಕೊನೆಗೊಳಿಸು ಈ ಕಹಿ ವಿರಹ ವೇದನೆಯ..

ಕಾದಿರುವೆ ನಿನಗಾಗಿ ಓ ಗೆಳೆಯಾ..

ನೀನಿಲ್ಲದೇ ಬಣ್ಣವಿಲ್ಲದ ಚಿತ್ರ ನಾನು..

ಸುವಾಸನೆ ಬೀರದ ಹೂವು ನಾನು..

ನಾದ ಹೊಮ್ಮದ ಬರಿಯ ವೀಣೆ ನಾನು..

ಹಸಿರಿಲ್ಲದ ಒಣಗಿದ ಭುವಿ ನಾನು..

ಚೈತನ್ಯ ತುಂಬಲು ಬಾ ಗೆಳೆಯಾ..