ಶೋಷಣೆ

ಹೆಣ್ಣೇ ನಿನಗೆ ಮಾತ್ರ ಏಕೇ
ಕಟ್ಟುಕಟ್ಟಳೆ ನಿಯಮ ಪಾಲನೆ?
ಪುರುಷನಿಗೂ ಇರಲಿ ಸ್ವಲ್ಪ
ಇದರ ಬಗ್ಗೆ ಯೋಚನೆ..

ಸಂಪ್ರದಾಯದ ಹೆಸರಿನಲಿ
ನಡೆಯುವುದು ಹೆಣ್ಣಿನ ಶೋಷಣೆ
ಕಂದಾಚಾರಗಳಿಂದ ದೊರೆಯುವುದು
ಪುರುಷರ ದೌರ್ಜನ್ಯಕ್ಕೆ ಪೋಷಣೆ.

ಕರಿಮಣಿ, ಕಾಲುಂಗುರಗಳೇ 
ಹೆಣ್ಣಿಗೆ ಬಿಡಿಸಲಾರದ ಬಂಧನ
ಅವಳ ಬವಣೆಯ ವಿಧವು
ಅನುದಿನವೂ ನೂತನ.

ಹೆಣ್ಣು ಹುಟ್ಟಿದರೂ, ಬೆಳೆ 
ಕಡಿಮೆಯಾದರೂ ಹಣ್ಣು ಕಾರಣ
ಏನೇ ಕೆಡುಕಾದರೂ ಹೇಳುವರು
ಅದಕ್ಕೆ ಕಾರಣ ಅವಳ ಕೆಟ್ಟ ಕಾಲ್ಗುಣ.

ಮಹಿಳೆ ಪುರುಷನ ಸಮಾನ
ಇದು ಕೇವಲ ಪ್ರಚಾರ
ಹೆಣ್ಣಿನಿಂದಲೇ ಹೆಣ್ಣಿನ ಶೋಷಣೆ
ಇದು ಪ್ರಸ್ತುತ ವಿಚಾರ.

ಮಹಿಳೆಯರೆಲ್ಲ ಒಂದಾಗಿ ಸೇರಿ
ಶೋಷಣೆ, ದೌರ್ಜನ್ಯವ ಮೀರಿ
ಹೊಂದಬೇಕು ಪುರುಷ ಪ್ರಧಾನ
ವ್ಯವಸ್ಥೆಯ ಸಮಾಧಿಯ ಗುರಿ