ದ್ವಿಮುಖ

ಕವಲೊಡೆದಿದೆ ಭಾವಗಳ ಬಾಳು
ಜೊತೆಯಾಗಿ ಕಂಡ ಕನಸು ಹೋಳು
ಬಾಳಾಗಿದೆ ಈಗ ಬರಿಯ ಗೋಳು
ಕಹಿಯಾಗಿದೆ ಜೀವನದ ತಿರುಳು

ಸಾಗರದ ಆಳಕೂ ಹರಡಿದೆ ನೋವು
ನೀಲ ಶರಧಿಗೂ ತಾಕಿದೆ ವಿರಹದ ಕಾವು
ಕಳಚುತಿದೆ ಒಲವ ಭಾವ ಬಂಧನವು
ಭಿನ್ನತೆಯು ಮೂಡಿ ಆಗಿದೆ ದ್ವಿಮುಖವು

ಮನವೆಂಬ ಸರೋವರದಿ ಭೋರ್ಗರೆತ
ಭಾವ ಸಾಗರದಲೆಗಳಲಿ ಬಲು ಏರಿಳಿತ
ಮನದೊಳಗಣ ನೋವಿನದೇ ತುಡಿತ
ಸ್ತಬ್ಧವಾಗಿದೆ ಈ ಹೃದಯದ ಮಿಡಿತ

ಒಂಟಿಯಾಗಿದೆ ಬಾಳ ಸಂಜೆಯ ಪಯಣ
ತಿಳಿಯುತಿಲ್ಲವು ಹುಡುಕಿದರೂ ಕಾರಣ
ತುಂಬಿದೆ ಮನದಿ ಬರಿ ನೋವ ಹೂರಣ
ಭಾರವಾಗಿದೆ ಒಲವಿಲ್ಲದೇ ಅಂತಃಕರಣ