ಜೀವ ಜೀವನ

ಜೀವವು ಇದ್ದರೆ ಜೀವನ ಎನ್ನುವಂತಾಗಿದೆ ಸ್ಥಿತಿ ಇಂದು
ಜೀವಿಯ ಜೀವದ ಜೊತೆ ಆಟವಾಡಿದ ಮನುಜ ಅಂದು
ಸ್ವಾರ್ಥದ ಜೀವನವು ಬೇಡ ಹೇ ಮನುಜ ಎಂದೆಂದೂ
ಯೋಚಿಸಿ ಕೆಲಸವನು ಮಾಡುವ ಹಿಂದು-ಮುಂದು

ಎಲ್ಲ ಜೀವರಾಶಿಗೂ ಜೀವ-ಜೀವನವು ಬಲು ಪ್ರಧಾನ
ಇದ ಅರಿತು ನಡೆ ಮನುಜ ಎಲ್ಲರೂ ಒಂದೇ ಸಮಾನ
ಕೈಲಾಗದವೆಂದು ಶೋಷಿಸದಿರು ನೀ ಅನುದಿನ
ಪ್ರತೀಕಾರ ತೀರಿಸಲು ಬಂದಿದೆ ನೋಡು ಸಣ್ಣ ಕೊರೋನ

ಕ್ಷಣದಲೇ ಬದಲಾಗಿ ಹೋಯಿತು ನಮ್ಮಯ ಜೀವನ
ಜೀವ ಭಯದಿಂದ ನಾಲ್ಕು ಗೋಡೆಯೊಳಗೆ ಬಂಧನ
ಮನುಜನ ಕಾಟ ಇಲ್ಲದೇ ಪ್ರಕೃತಿಗೆ ಅಮೃತ ಸಿಂಚನ
ಆದರೆ ನಮ್ಮ ಬದುಕು ಭಯದ ನೆರಳಲಿ ಅನುದಿನ

ಬೇಡವೇ ಬೇಡ ನೈಸರ್ಗಿಕ ಹಸಿರು ಪರಿಸರದ ನಾಶ
ನಗರೀಕರಣ ಆಧುನೀಕರಣದಿಂದಲೇ ನಮ್ಮ ವಿನಾಶ
ಹಣ ಹಿಂದೆ ಓಡುತ ಹಾಕಬೇಡ ಬಗೆಬಗೆಯ ವೇಷ
ಕಳೆದುಕೊಳ್ಳಬೇಡ ಈ ಕ್ಷಣದ ಜೀವನದ ಸಂತೋಷ