ಅರುಣೋದಯ

ಬಾನಲಿ ಮೂಡಿಹ ಸುಂದರ ನೇಸರ
ಕಳೆಯುವ ಮನದಿ ತುಂಬಿಹ ಬೇಸರ
ತನು-ಮನದಿ ಚೈತನ್ಯದ ಸಂಚಾರ
ಪ್ರಕೃತಿಗೆ ಭಾನುವಿನ ಕಿರಣದ ಹಾರ

ಕರಗುತಿದೆ ಇಬ್ಬನಿಯ ಮುತ್ತಿನ ತೋರಣ
ಬೆಳಗಿದು ಸುಂದರ, ಸವಿಯ ಹೂರಣ
ಭುವಿಯ ತುಂಬಾ ಚೆಲ್ಲಿದೆ ಹೊಂಗಿರಣ
ಕೆಂಪು ಚೆಲ್ಲಿ ಬಣ್ಣವಾಗಿದೆ ಮೂಡಣ

ಹರಡಿದೆ ಅರಳುವ ಹೂವಿನ ಕಂಪು
ಮನಸಿಗೆ ನೀಡಿದೆ ಆಹ್ಲಾದದ ತಂಪು
ಜೊತೆಯಲಿ ಚಿಲಿಪಿಲಿ ಉಲಿಯ ಇಂಪು
ಆವರಿಸಿದೆ ಬೆಚ್ಚನೆ ಬಿಸಿಲಿಗೆ ಹುರುಪು

ನೇಸರನುದಯದಿ ನಾಚಿ ನೀರಾದ ಭುವಿ
ಸಕಲ ಜೀವರಾಶಿಗೂ ಈ ಬೆಳಗು ಸವಿ
ಝೇಂಕರಿಸುತಿದೆ ಸುಪ್ರಭಾತದ ಪಲ್ಲವಿ
ಅರುಣೋದಯವ ನೋಡಿ ಆದೆ ಕವಿ