ಮುಂಜಾನೆಯ ಮಳೆ

ಮುತ್ತಿನ ಹನಿಗಾಗಿ ಕಾಯ್ವ ಇಳೆ
ಮುಂಜಾನೆಯ ಸೋನೆ ಮಳೆ
ತೊಳೆಯಿತೆಲ್ಲ ಇಳೆಯ ಕೊಳೆ
ಜನಿಸಿತಾಗ ಹಚ್ಚಹಸಿರ ಬೆಳೆ

ಹಸಿರ ಸೀರೆಯುಟ್ಟ ಭುವಿ
ನಾಚಿ ನೀರಾದಳು ಬರಲು ರವಿ
ಹೊಂಗಿರಣದ ಸ್ಪರ್ಶದ ಸವಿ
ಕೇಳುತಿದೆ ಪ್ರೇಮರಾಗದ ಪಲ್ಲವಿ

ಹಾಲಿನಂತೆ ಹರಿವ ನೀರ ಝರಿ
ಎಂಥ ಚಂದ ಭೂರಮೆಯ ಸಿರಿ
ತೆರೆದಂತಿದೆ ಸ್ವರ್ಗದ ದಾರಿ
ಅದಕೆ ನಿಲುಕದ ಸೊಬಗ ವೈಖರಿ

ಸಕಲ ಜೀವರಾಶಿಗಿದುವೆ ನೆಲೆ
ಅದ್ಭುತ ದೇವ ಸೃಷ್ಟಿಯ ಕಲೆ
ಬೆಳಗಿದುವೆ ಚೈತನ್ಯದ ಸೆಲೆ
ರಮ್ಯತೆಗೆ ಕಟ್ಟಲಾದೀತೆ ಬೆಲೆ??