ಹೆಣ್ಣಿನ ಬದುಕು

 

ಜೊತೆಗಿಹುದು ಕಾನೂನು ಸಂವಿಧಾನ
ಆದರೂ ನಿಲ್ಲದಿದು ನೋವಿನ ಯಾನ
ಶೋಷಣೆಯಲೇ ಕಳೆಯುತಿದೆ ಜೀವನ
ಹೆಣ್ಣಿನ ಭಾವನೆಗಳಿಗಿಲ್ಲವು ಸ್ಪಂದನ

ನಿಲ್ಲಲಿಲ್ಲ ಅತ್ಯಾಚಾರಿಗಳ ಅಟ್ಟಹಾಸ
ಮೊಳಗುತಿದೆ ದುರುಳರ ಮಂದಹಾಸ
ವಿಕೃತ ಮನಸುಗಳ ಮನದ ಸಂತಸ
ಶೋಷಣೆಗಿದೆ ಶತಮಾನದ ಇತಿಹಾಸ

ಆಗಲಿ ಅತ್ಯಾಚಾರಿಗಳಿಗೆ ಕಠಿಣ ಶಿಕ್ಷೆ
ನೀಡಬಾರದು ಮತ್ತೆ ಜೀವನದ ಭಿಕ್ಷೆ
ತೊಡುವ ನಾರಿಯ ಸಮ್ಮಾನದ ದೀಕ್ಷೆ
ಸಮಾಜದಿ ನೆಲೆಸಲಿ ಶಾಂತಿ ಸುಭೀಕ್ಷೆ

ನಾರಿಯ ಕಣ್ಣೀರು ಕೊನೆಯಾಗಲಿ
ಅತ್ಯಾಚಾರಿಗಳ ಬಾಳು ಅಂತ್ಯವಾಗಲಿ
ಸುಭದ್ರ ಸಮಾಜ ನಿರ್ಮಾಣವಾಗಲಿ
ಹೆಣ್ಣಿನ ಶೋಷಣೆ ಮುಕ್ತಾಯವಾಗಲಿ

ರೈತ

ದುಡಿಮೆ ಹೊಲದಿ ಬೆವರು ಸುರಿಸಿ
ನೆತ್ತರನು ಅಲ್ಪಸ್ವಲ್ಪ ಜೊತೆಗೆ ಬೆರೆಸಿ
ಮೂಳೆಯ ಪರಿಶ್ರಮವ ಹರಿಸಿ
ಬೆಳೆಯುವೆನು ನಾನು ಪುಟ್ಟ ಸಸಿ

ಹೊರುವೆ ಮೈತುಂಬ ಸಾಲವನು
ಬೆಳೆಯನೇ ನಂಬಿ ಬದುಕುವೆನು
ತಿಳಿಯೇ ಪ್ರಕೃತಿಯ ಆಟವನು
ಕಷ್ಟದಲೇ ನೂಕುವೆ ದಿನವನು

ಕೊಡುವೆ ಜಗದ ಜನಕೆ ಅನ್ನವನು
ಕೇಳರು ಯಾರೂ ನನ್ನ ಗೋಳನು
ಚಪ್ಪಲಿಯೂ ಇಲ್ಲದೆ ನಡೆವೆನು
ನನಗೂ ನೀಡಿ ಸಹಾಯವನು

ಇಲ್ಲ ಸರ್ಕಾರದ ಸಹಾಯ ಸವಲತ್ತು
ಓಟು ಕೇಳುವಾಗ ನನ್ನ ನೆನಪಿತ್ತು
ಎಲ್ಲರೂ ನಂಬಿಸಿ ಕೊಯ್ವರು ಕತ್ತು
ಸಾಗುತಿರುವೆ ಬದುಕ ನೊಗ ಹೊತ್ತು

ದ್ವಿಮುಖ

ಕವಲೊಡೆದಿದೆ ಭಾವಗಳ ಬಾಳು
ಜೊತೆಯಾಗಿ ಕಂಡ ಕನಸು ಹೋಳು
ಬಾಳಾಗಿದೆ ಈಗ ಬರಿಯ ಗೋಳು
ಕಹಿಯಾಗಿದೆ ಜೀವನದ ತಿರುಳು

ಸಾಗರದ ಆಳಕೂ ಹರಡಿದೆ ನೋವು
ನೀಲ ಶರಧಿಗೂ ತಾಕಿದೆ ವಿರಹದ ಕಾವು
ಕಳಚುತಿದೆ ಒಲವ ಭಾವ ಬಂಧನವು
ಭಿನ್ನತೆಯು ಮೂಡಿ ಆಗಿದೆ ದ್ವಿಮುಖವು

ಮನವೆಂಬ ಸರೋವರದಿ ಭೋರ್ಗರೆತ
ಭಾವ ಸಾಗರದಲೆಗಳಲಿ ಬಲು ಏರಿಳಿತ
ಮನದೊಳಗಣ ನೋವಿನದೇ ತುಡಿತ
ಸ್ತಬ್ಧವಾಗಿದೆ ಈ ಹೃದಯದ ಮಿಡಿತ

ಒಂಟಿಯಾಗಿದೆ ಬಾಳ ಸಂಜೆಯ ಪಯಣ
ತಿಳಿಯುತಿಲ್ಲವು ಹುಡುಕಿದರೂ ಕಾರಣ
ತುಂಬಿದೆ ಮನದಿ ಬರಿ ನೋವ ಹೂರಣ
ಭಾರವಾಗಿದೆ ಒಲವಿಲ್ಲದೇ ಅಂತಃಕರಣ

ಕಂದಾ

ಮುದ್ದು ಮೊಗದ ಹಸುಕಂದ
ನಿನ್ನಾ ನಗುವೇ ಬಲು ಚೆಂದ
ನೀ ನನ್ನ ಮನದ ಆನಂದ
ಜನ್ಮಾಂತರದ ಈ ಅನುಬಂಧ

ಕೃಷ್ಣನಾಗು ಯಶೋದೆಯಾಗುವೆ
ರಾಮನಾದರೆ ಕೌಸಲ್ಯೆಯಾಗುವೆ
ಗಣಪನಾದರೆ ನಾ ಗೌರಿಯಾಗುವೆ
ನಾ ನಿನ್ನಯ ಹಿಂದಿರುವೆ ಮಗುವೆ

ಅಭ್ಯಂಗ ಧಾರೆಯ ಮೈಗೆ ತೀಡುವೆ
ಜಲಧಾರೆಯಲಿ ಸ್ನಾನ ಮಾಡಿಸುವೆ
ಪ್ರೀತಿಯಲಿ ಕೈತುತ್ತನು ನೀಡುವೆ
ಯನ್ನ ಮಡಿಲಲಿ ಮಲಗು ಮಗುವೆ

ನನ್ನ ಜೀವದ ಜೀವವು ನೀನು
ಮನೆಯ ನಂದಾದೀಪವು ನೀನು
ಈ ಬಾಳ ಹಸಿರು ಉಸಿರು ನೀನು
ನಿನ್ನ ಕಂಠದ ಸ್ವರವು ಸವಿಜೇನು

ದೇವ ಮಾನವ ಯೇಸು

ಬೆತ್ಲೆಹೇಂನಲ್ಲಿ ಜನಿಸಿದ ಕೂಸು
ದೇವ ಮಾನವನ ಹೆಸರು ಏಸು
ಮೇರಿ-ಜೋಸೆಫ್ ರ ಸುತನೀತ
ಅಹಿಂಸೆಯ ಜಗಕೆ ಸಾರಿದಾತ

ಚುಮುಚುಮು ಚಳಿಯಲಿ
ಇಪ್ಪತ್ತೈದು ಡಿಸೆಂಬರ್ ನಲಿ
ಯೇಸುಕ್ರಿಸ್ತನ ಜನುಮ ದಿನವು
ಇದುವೇ ಕ್ರಿಸ್ ಮಸ್ ಹಬ್ಬವು

ಬರುವನು ಕೆಂಪಂಗಿಯ ತಾತಾ
ಉಡುಗೊರೆಯ ತರುವ ತಾತಾ
ಕ್ರಿಸ್ ಮಸ್ ಟ್ರೀಗೆ ದೀಪಾಲಂಕಾರ
ಸ್ಮರಿಸುತ ಯೇಸುವಿನ ಉಪಕಾರ

ಸ್ನೇಹ ಸಹಬಾಳ್ವೆ ಇವನ ಉಸಿರು
ಶಾಂತಿ ಸಹನೆ ಸಾರಿ ಜಗ ಹಸಿರು
ಪಠಿಸುತ ಪವಿತ್ರ ಬೈಬಲ್ ಗ್ರಂಥವನು
ತಾನೇ ಹೊರುತಲಿ ಎಲ್ಲರ ನೋವನು

ಪಾರಿ

ನನ್ನಯ ಮುದ್ದಿನ ಗೊಂಬೆ ಪಾರಿ
ಇದುವೇ ನನ್ನಯ ಮೆಚ್ಚಿನ ಆಟಿಕೆ
ಗುಲಾಬಿ ಬಣ್ಣದ ನನ್ನಯ ಗೊಂಬೆ
ನಿಮಗೂ ಇದುವು ಆಡಲು ಬೇಕೇ?

ಪಾರಿ ಎಂಬ ಮುದ್ದಿನ ಗೊಂಬೆಯ
ಅಪ್ಪನು ಜಾತ್ರೆಯಿಂದ ತಂದಿಹನು
ಪಿಳಿ ಪಿಳಿ ಕಣ್ಣಿನ ಗೊಂಬೆಯ
ನನಗೆ ಆಡಲು ಜೊತೆ ಮಾಡಿಹನು

ಜರಿಯ ಲಂಗವನು ಧರಿಸಿರುವ
ಗೊಂಬೆಯ ಜೊತೆಗೆ ನನ್ನ ಊಟ
ಹೊಂಬಣ್ಣದ ಕೂದಲಿನ ಚೆಂದದ
ಗೊಂಬೆ ಇಲ್ಲದೆ ಆಗದು ಆಟ-ಪಾಠ

ಗೊಂಬೆಯ ಜೊತೆಗೆ ಆಡುವೆ
ಅಮ್ಮ-ಮಗುವಿನ ಆಟವನು
ತಲೆಯನು ಬಾಚಿ ಸ್ನಾನವ
ಮಾಡಿಸಿ ತಿನಿಸುವೆ ಊಟವನು

ಮುದ್ದಿನ ಗೊಂಬೆಯೇ ಪಾರಿ
ನೀ ಎಂದಿಗೂ ನನ್ನಯ ಗೆಳತಿ
ಮರೆಯಲಾರೆ ಎಂದೆಂದಿಗೂ
ನೀನೇ ಬಾಲ್ಯದ ಜೊತೆಗಾತಿ

ನಂಬಿಕೆ

 

ಅಳಸಬೇಕು ನಾವು
ಮೂಢನಂಬಿಕೆಗಳನು
ಜೀವನದಿ ಇಡುವ
ಹೊಸ ಹೆಜ್ಜೆಯನು

ಕಳೆಯುತಿದೆ ಹಳೆಯ
ಏಳುಬೀಳಿನ ವರುಷವು
ಬರುತಲಿದೆ ಸಂತಸದಿ
ಹೊಸ ಮನ್ವಂತರವು

ಅಜ್ಞಾನ ಅಂಧಕಾರವನು
ನಾವು ಓಡಿಸುವ ಇಂದು
ಸುಜ್ಞಾನದ ಜ್ಯೋತಿಯನು
ಬೆಳಗಿಸುವ ಬಾ ಬಂಧು

ಮಹಿಳೆಯರಿಗೆ ನೀಡುವ
ಸ್ವಾತಂತ್ರ್ಯದ ಸವಿಯ
ನಂಬಿಕೆಯ ತುಂಬುತಾ
ಮನುಕುಲಕೆ ಅಭಯ

ನೀರಿನ ಸದ್ಭಳಕೆ

ಬನ್ನಿ ಉಳಿಸೋಣ ಜೀವಜಲ
ಹಸಿರಾಗಿಸುವ ನಮ್ಮಯ ನೆಲ
ಉಳಿಸುವ ಜೀವಿಗಳ ಪ್ರಾಣ
ಮಕ್ಕಳೇ ತೊಡುವ ಇಂದೇ ಪಣ

ಪೋಲು ಮಾಡದಿರಿ ಹನಿ ನೀರು
ಉಳಿಸುವ ಜೀವಜಲದ ತುಂತುರು
ಮಾಡುವ ಅಂತರ್ಜಲದ ಉಳಿಕೆ
ದಿನನಿತ್ಯ ಮಾಡುವ ನೀರಿನ ಸದ್ಭಳಕೆ

ಹಸಿರೇ ನಮ್ಮಯ ಜೀವದುಸಿರು
ಹಸಿರು ಉಳಿದರೆ ಉಂಟು ನೀರು
ಅತಿವೃಷ್ಟಿ ಅನಾವೃಷ್ಟಿ ತಡೆಯುವ
ಹಸಿರು ಗಿಡಗಳನು ನಾವು ಬೆಳೆಸುವ

ಕಾಡು ಕಡಿದರೆ ನೀರಿಗೆ ಹಾಹಾಕಾರ
ಜೀವ ಸಂಕುಲಗಳಿಗೆ ಸಂಚಕಾರ
ಕಲಿಯುವ ನೀರಿನ ಹಿತಮಿತ ಬಳಕೆ
ಇದುವೆ ಆಗಿದೆ ಮುಂದಿನ ಗಳಿಕೆ

ಕರೆಕಟ್ಟೆಗಳನು ಕಲುಷಿತಗೊಳಿಸದೆ
ಸ್ವಚ್ಛ ಇಡುವ ಪಣ ತೊಡುವ ಇಂದೆ
ಪರಿಸರವನು ಇರಿಸುವ ಸ್ವಚ್ಛವಾಗಿ
ಎಲ್ಲರನು ಕರೆಯುವ ನಾವು ಕೂಗಿ

ಮಧುರ ಬಾಲ್ಯ

ಮರೆಯಲಾಗದ ಮಧುರ ಬಾಲ್ಯ
ಇದಕೆ ಕಟ್ಟಲಾಗದು ನಿಖರ ಮೌಲ್ಯ
ಬಾಲ್ಯದ ಕ್ಷಣಗಳಿಗೆ ಅಲ್ಲವೂ ತುಲ್ಯ
ಮರಳಿ ಬರಬಾರದೇ ಆ ಬಾಲ್ಯ

ಸೀಬೆ ಹಣ್ಣು ಕದ್ದು ತಿಂದ ನೆನಪು
ಮರವನು ಹತ್ತಿ ಬಿದ್ದ ಹುರುಪು
ಸುತ್ತ ಇರುವ ಸ್ನೇಹಿತರ ಗುಂಪು
ಬಾಲ್ಯದ ನೆನಪು ಮನದಿ ಸೊಂಪು

ವರ್ಣಮಾಲೆ ಕಲಿತ ಮುದವು
ಶಾಲೆಯ ಮೊದಲ ದಿನದ ಭಯವು
ಮರೆಯದ ಗುರುಗಳ ಹೊಡೆತವು
ಮನಃ ಪಟಲದಿ ಹಸಿರು ನಿತ್ಯವು

ಕುಂಟೆ-ಬಿಲ್ಲೆ, ನೆಲ್ಲಿ ಕಾಯಿಯ ಸವಿ
ಸ್ವರ್ಗವು ಎಂದೂ ಬಾಲ್ಯದಿ ಭುವಿ
ಚಿಂತೆ, ಬಡತನ ಅಂದು ಗಿರವಿ
ಬಾಲ್ಯದ ನೆನಪಲಿ ಆದೆನು ಕವಿ

ಸ್ಪೂರ್ತಿ ಗೀತೆ

 

ಮಾರ್ಗದರ್ಶನ ನೀಡುವವರು
ಇಲ್ಲದಿದ್ದರೇನು ತೊಂದರೆ
ಹೊಸ ಮಾರ್ಗವನೇ ಸೃಷ್ಟಿಸುವ
ಧೈರ್ಯ, ಛಲವು ನಿನ್ನಲಿ ಇದ್ದರೆ

ಜಗವೇ ಬರುವುದು ನೀ
ಸೃಷ್ಟಿಸಿದ ಮಾರ್ಗದಲಿ ಎಂದು
ಸ್ವಾಮಿ ವಿವೇಕಾನಂದರ
ನುಡಿಯಿದು ಸತ್ಯವು ಎಂದೆಂದೂ

ಆತ್ಮಸ್ಥೈರ್ಯದ ಮುಂದೆ
ಎಲ್ಲ ಕಷ್ಟಗಳು ಸೊನ್ನೆ
ಮರೆತು ಬಿಡು ಸೋಲಿನ
ಅವಮಾನಗಳ ನಿನ್ನೆ

ಮುಂದಿರುವ ಗುರಿಯೆಡೆಗೆ
ಸಾಗು ನೀ ಎಡೆಬಿಡದೆ
ಮನೋಬಲವು ಇರಲಿ
ಓಡು ನೀ ಎದೆಗುಂದದೆ

ಜೊತೆಯಿರಲಿ ಎಂದೂ
ಸತ್ಯ, ಮಾನವೀಯತೆ
ಬದುಕಾಗಲಿ ನಿತ್ಯವೂ
ವಿಜಯದ ಸ್ಪೂರ್ತಿಗೀತೆ

ಸೂರ್ಯಾಸ್ತಮಾನ

ನಾ ಕಂಡ ಇಳೆಯ ಸಂಜೆಯು
ಸ್ವರ್ಗ ಮೀರಿಸುವ ಸೊಬಗು
ಬಾನಿಂದ ಜಾರುತಿರುವ
ಸೂರ್ಯನ ಬಣ್ಣದ ಮೆರಗು

ಗೂಡು ಸೇರುವ ತವಕದಿ
ಹಕ್ಕಿಗಳ ಚಿಲಿಪಿಲಿ ಉಲಿಯು
ಬಾನಲಿ ಬಣ್ಣಗಳ ಚಿತ್ತಾರ
ಇದು ರವಿಯ ಕಲೆಯು

ಸೂರ್ಯಾಸ್ತಮಾನದಲಿ
ದೈವದ ಸೃಷ್ಟಿಗೆ ಇಲ್ಲ ಸಾಟಿಯು
ಸತ್ತಲೂ ಮನ ಸೆಳೆಯುವ
ಹಸಿರ ಸೊಬಗಿನ ಸಿರಿಯು

ಪದಗಳಿಗೆ ನಿಲುಕದಿಹ
ಸೊಬಗಿನಾ ಜಾಲವು
ಗಿರಿಯ ನಡುವೆ ರವಿಯು
ನಯನ ಮನೋಹರವು

ಬದುಕು

ಬದುಕಲಿದೆ ಸಾಧಿಸುವ ಹಂಬಲ
ಬೇಕಾಗಿದೆ ಸತತ ಮನೋಬಲ
ಜೊತೆಯಲಿರಲಿ ಅಧಮ್ಯ ಛಲ
ಮನವಾಗದಿರಲಿ ಎಂದೂ ಚಂಚಲ

ಕಾಯಕದಿ ಇಹುದು ಕೈಲಾಸ
ದೂರವಿರಲಿ ಕಲ್ಪನಾ ವಿಲಾಸ
ಚಿಮ್ಮಲಿ ಗೆಲುವ ಮಂದಹಾಸ
ಮುಗಿಯಲಿ ಸೋಲಿನ ಅಟ್ಟಹಾಸ

ಮನಸಿದ್ದರೆ ಇದೆಯು ಮಾರ್ಗವು
ಕಷ್ಟ ಸುಖದ ನಡುವೆ ಜೀವನವು
ಒಂದೇ ನಾಣ್ಯದೆರಡು ಮುಖವು
ಗುರಿಯ ಹಿಂದೆ ಇರಲಿ ಓಟವು

ಕಠಿಣವು ಜೀವನವೆಂಬ ಸಾಗರವು
ಈಜಿದಾಗಲೇ ಸಿಗುವುದು ದಡವು
ಇರಲಿ ಸದಾ ದೇವರ ಅನುಗ್ರಹವು
ಜೊತೆಯಾಗಲಿ ವಿಧಿಯ ಬೆಂಬಲವು

ಬದುಕು ಸುಖ-ದುಃಖಗಳ ಸಮ್ಮಿಶ್ರಣ
ಅಲ್ಲವು ಕೇವಲ ಸಿಹಿಯ ಹೂರಣ
ಬದುಕಾಗಲಿ ಹಲವರಿಗೆ ಅನುಕರಣ
ಸಹ ಜೀವನವಾಗಲಿ ಅನಾವರಣ

ತೆರೆಯಲಿ ಹೊಸದಾದ ಮನ್ವಂತರ
ಬದುಕಾಗಲಿ ಸಂತಸದ ಹಂದರ
ಮನವಾಗಲಿ ಶಾಂತಿಯ ಮಂದಿರ
ಇದುವೇ ಜೀವನದ ಸಾಕ್ಷಾತ್ಕಾರ

ಬದುಕು-ಬವಣೆ

ಬದುಕು ನಿತ್ಯ ಬವಣೆಯ ಗೂಡು
ಹೊತ್ತಿದೆ ಬಾಳಿನ ಕನಸನು ನಡು
ತಲೆಯ ಮೇಲಿಹ ಭಾರವ ನೋಡು
ಸವೆಯುತಿಹುದು ಕಾಲಿನ ಜೋಡು

ಆಸರೆಯ ಸೂರಿಗಾಗಿ ಹುಡುಕಾಟ
ಕಾಯಕವ ಹುಡುಕಿ ಅಲೆದಾಟ
ನಿತ್ಯವೂ ದೊರೆಯುವುದು ಪಾಠ
ಕೊನಯಾಗದ ಬದುಕ ಪರದಾಟ

ಕೇಳುವರಿಲ್ಲ ಒಂಟಿ ಹೆಣ್ಣಿನ ಬವಣೆ
ಹೊರಲೇ ಬೇಕು ಜೀವನದ ಹೊಣೆ
ವಿಧಿಗೆ ಇಲ್ಲವೂ ಸ್ವಲ್ಪವೂ ಕರುಣೆ
ಪ್ರತಿಷ್ಠೆ, ಹಣ ಇರುವವರಿಗಿಲ್ಲಿ ಮಣೆ

ಬವಣೆಯಲೆ ಕಳೆಯುತಿದೆ ಬಾಳು
ಜೀವನದಲಿ ತುಂಬಿಹದು ಗೋಳು
ದೀನಬಂಧು ಪರಿಹಾರವ ಹೇಳು
ದೇವನೇ ನೀನೇ ಮೊರೆಯ ಕೇಳು

ಬಣ್ಣದ ಬದುಕು

ಇದು ಬಣ್ಣದ ಬದುಕು
ಕೇವಲ ಸುಖವ ಹುಡುಕು
ಆಚರಣೆಗಳೆಲ್ಲ ಕೆಡುಕು
ಬರೀ ಥಳುಕು ಬಳುಕು

ಕಷ್ಟ ಪಡುವವರಿಲ್ಲ ಯಾರೂ
ಸುಖ ಬಯಸುವರು ಎಲ್ಲರೂ
ನಗರವ ಸೇರಿದರು ಜನರು
ಮಾನವೀಯನು ಮರೆತರು

ಹಣದ ಹಿಂದಾಯಿತು ಓಟ
ಮರೆತರು ದಿನದ ಊಟ
ಮರೆಯಿತು ಸಂಬಂಧದ ಪಾಠ
ಜೀವವಾಯಿತು ರೋಗದ ಕೂಟ

ಇದು ಬರೀ ಆಧುನಿಕ ಜೀವನ
ಅಭ್ಯಾಸಗಳೆಲ್ಲ ನವನವೀನ
ಹಳ್ಳಿಯ ಇದು ಕೇವಲ ಕಥನ
ಮೋಜು ಮಸ್ತಿ ಬದುಕ ವಿಧಾನ

ಹೆತ್ತವರಿಗಾಯಿತು ಅನಾಥಾಲಯ
ಕೇವಲ ಪದಗಳಾದವು ನಯವಿನಯ
ಇಲ್ಲದಾಯಿತು ನಂಬಿಕೆಯ ಭಯ
ಮರೆತಾಯಿತು ಕರುಣೆ, ದಯ

ರವಿ ಬೆಳಗೆರೆ

ಜನ್ಮವು ಬಳ್ಳಾರಿ ಸತ್ಯನಾರಾಯಣ ಪೇಟೆಯು
ಕೈಬೀಸಿ ಕರೆಯಿತು ಅಧ್ಯಾಪಕ ವೃತ್ತಿಯು
ನಟನೆ, ನಿರೂಪಣೆ, ಬರವಣಿಗೆ ಪ್ರವೃತ್ತಿಯು
ಮಂತ್ರಮುಗ್ಧವಾಗಿಸಿತು ಇವರ ಬರವಣಿಗೆಯು

ಬರಹ ಲೋಕದ ಮಹಾ ಮಾಂತ್ರಿಕ
ಕಂಚಿನ ಕಂಠದ ಅದ್ಭುತ ನಿರೂಪಕ
ಪಾಕ್ಷಿಕ, ಮಾಸಿಕ ಪತ್ರಿಕೆಯ ಸಂಪಾದಕ
ಪ್ರಾರ್ಥನಾ ವಿದ್ಯಾ ಸಂಸ್ಥೆಯ ಸಂಸ್ಥಾಪಕ

ಯುವ ಮನಸುಗಳಿಗೆ ಬರವಣಿಗೆಯ
ಗೀಳು ಹಿಡಿಸಿದ ಮಹಾ ಜಾದೂಗಾರ
ಜ್ಞಾನ ದೀಪವ ಹೊತ್ತಿಸಿದ ದೈವ ನೀ
ಪ್ರತೀ ಅಕ್ಷರಕೂ ಜೀವ ತುಂಬಿದ ಕಥೆಗಾರ

ಹೇಳಿ ಹೋಗು ಕಾರಣ ಎನ್ನುತಲಿ
ಹೇಳದೆ ಹೋದೆ ಬಾರದ ಲೋಕಕೆ
ಯಾರು ಹೇಳುವರು ಇನ್ನು ಸಾಂತ್ವನ
ನೋವು-ದುಃಖ ತುಂಬಿದ ಮನಕೆ

ಭಾವುಕತೆ, ಧೈರ್ಯದಲಿ ಮೀರಿಸುವರಿಲ್ಲ
ಬರಹವಣಿಗೆ ಲೋಕವೇ ಅನಾಥವಾಯ್ತಲ್ಲ
ಕಂಚಿನ ಕಂಠದಾ ಅಬ್ಬರವು ಇನ್ನಿಲ್ಲ
ಅಕ್ಷರ ಮಾಂತ್ರಿಕನ ಬದುಕು ಮುಗಿಯಿತಲ್ಲ

ಅಕ್ಷರ ದೀಪ

 
ನಮ್ಮ ಹೆಮ್ಮೆಯ ವೇದಿಕೆ ಅಕ್ಷರ ದೀಪ
ಹಚ್ಚುವ ನಾವು ಇಲ್ಲಿ ಅಕ್ಷರಗಳ ದೀಪ
ಸಾಹಿತ್ಯಕೆ ಕೊಡುವುದು ಹೊಸ ರೂಪ
ಕವಿ ಮನಸುಗಳಿಗಿದುವೇ ನಂದಾದೀಪ

ಅಕ್ಷರದ ದೀಪ ಹಚ್ಚಲು ವೇದಿಕೆ ಇದುವು
ಸೃಜನಶೀಲತೆಗೆ ಇದು ಆಗಿಹುದು ಒಡಲು
ಉತ್ತಮ ಸ್ಪರ್ಧೆಯ ವಿಧಗಳು ಹತ್ತು ಹಲವು
ಸಾಹಿತ್ಯ ಜ್ಞಾನವನು ಹೊತ್ತು ತರುವ ಕಡಲು

ನಮ್ಮ ವೇದಿಕೆಯೆಂಬ ಹೆಮ್ಮೆ ನಮಗೆ
ನಿರಂತರವೂ ಸಾಹಿತ್ಯದ ಬೆಳವಣಿಗೆ
ಕೀರ್ತಿ ಹರಡಲಿ ಜಗದ ತುದಿಯವರೆಗೆ
ದಿನವೂ ಕನ್ನಡ ಸಾಹಿತ್ಯದ ಮೆರವಣಿಗೆ

ಪ್ರತಿಭೆಗಳಿಗೆ ದೊರೆಹುದು ಇಲ್ಲಿ ಪುರಸ್ಕಾರ
ಇದುವು ಕವಿ ಹೃದಯಗಳ ಭಾವದ ಸಾಗರ
ಸೃಜನಶೀಲ ವಿಚಾರಗಳ ಸುಂದರ ಹಂದರ
ಕವಿ ಮನಗಳಿಗಿದು ಅವಕಾಶಗಳ ಆಗರ

ಮಕ್ಕಳು

ಮಕ್ಕಳು

ಮಕ್ಕಳ ಮನವಿದು ಹೂವಿನಂತೆ
ಮಗ್ಧತೆಯ ಪ್ರತಿ ರೂಪದಂತೆ
ನಿಷ್ಕಲ್ಮಷತೆ ತುಂಬಿದ ಹೃದಯ
ಆ ನಗುವಿನಲೇ ಜಗ ತನ್ಮಯ

ಮನೆಯೇ ಮೊದಲ ಪಾಠಶಾಲೆ
ಜನನಿಯೇ ಮೊದಲ ಗುರುವು
ಹಾಕಬೇಕು ಭದ್ರ ಬುನಾದಿ ನೆಲೆ
ಮೌಲ್ಯಗಳೇ ಬಾಳಿಗೆ ಬಲವು

ಉತ್ತಮ ಆಹಾರವ ಒದಗಿಸಿ
ವಿದ್ಯೆ ನೀಡಿ ಬಾಳನು ಬೆಳಗಿಸಿ
ಬೇಕು ಬೇಡಗಳನು ಪೂರೈಸಿ
ಉಜ್ವಲ ಭವಿಷ್ಯಕೆ ಹಾರೈಸಿ

ಕೆಲಸವು ಬೇಡವು ಬಾಲ್ಯದಲಿ
ಬೆಳೆಯುವ ಸಿರಿ ಮೊಳಕೆಯಲಿ
ಉತ್ತಮ ಶಿಕ್ಷಣವು ದೊರೆಯಲಿ
ಸಂಸ್ಕಾರ ಸಂಸ್ಕೃತಿಯೂ ಇರಲಿ

ಇಂದಿನ ಮಕ್ಕಳೇ ನಾಳಿನ ಪ್ರಜೆಗಳು
ನಮ್ಮ ಸಮಾಜದ ನಂದಾದೀಪಗಳು
ಹೆತ್ತವರಿಗೆ ಇವರೇ ಎಂದೂ ಕಣ್ಣುಗಳು
ನಮ್ಮ ಬದುಕಿನ ಹೊಸ ಕನಸುಗಳು

ಮನದನ್ನೆ

ಮನೋಹರಿ ನನ್ನ ಮನದನ್ನೆ
ಮುಡಿಪಾಗಿಡುವೆ ಬದುಕನ್ನೆ
ಸುರಿವೆ ಪ್ರೀತಿಯ ಧಾರಯನ್ನೆ
ಗಣದಲಿ ಸುಗುಣೆ ಸಂಪನ್ನೆ

ಮನವ ಕದ್ದ ಕೋಮಲ ಹರಿಣಿ
ನೀನೆ ನನ್ನ ಮನೆಯ ಮಹರಾಣಿ
ಆಗಿರುವೆ ಸೌಂದರ್ಯದ ಕಣಿ
ಮೃದುಭಾಷಿ ನನ್ನ ಅರಗಿಣಿ

ಭಾವ ತರಂಗದ ಗುಪ್ತಗಾಮಿನಿ
ನನ್ನ ಉಸಿರಾಗಿಹ ಮಾನಿನಿ
ನಡಿಗೆಯಲಿ ಇವಳು ಹಂಸಿನಿ
ಚತುರೆ ಸುಜ್ಞಾನದ ವಾಹಿನಿ

ಪಾಕಶಾಸ್ತ್ರದಲಿ ಪ್ರವೀಣೆಯು
ಕಲೆ ಸಾಹಿತ್ಯದಲಿ ಇಲ್ಲ ಸಾಟಿಯು
ಇವಳೇ ನಾಟ್ಯ ಮಯೂರಿಯು
ನನ್ನ ಬಾಳಿನ ಕಾವ್ಯ ಕನ್ನಿಕೆಯು

ಕರುನಾಡು

ನಮ್ಮದಿದು ನಮ್ಮದಿದು ಚೆಲುವ ಕನ್ನಡ ನಾಡು
ಶಿಲ್ಪಕಲೆ ಸಂಸ್ಕೃತಿಯ ವೈಭವದ ಸಿರಿನಾಡು
ಹಸಿರ ಸಿರಿ ಮೈತಳೆದ ಸೊಬಗಿನ ಕರುನಾಡು
ತೆಂಗು-ಕಂಗು, ಭತ್ತ-ರಾಗಿ ಬೆಳೆಯುವ ನಾಡು
ಸಾಹಿತ್ಯ ಸಿರಿಯಲೂ ಮೇರು ಆಗಿಹ ನಾಡು

ಕೃಷ್ಣೆ ಕಾವೇರಿ ಶರಾವತಿ ತುಂಗೆಯರ ನೆಲೆವೀಡು
ಸಹ್ಯಾದ್ರಿಯ ಸಾಲು ಮೈತಳೆದ ಕರುನಾಡು
ಕೆಚ್ಚೆದೆಯ ವೀರರಿಗೆ ಜನುಮ ನೀಡಿದ ಗೂಡು
ಜಕ್ಕಣ-ಡಂಕಣನ ಶಿಲ್ಪಕಲೆಗೆ ಹೆಸರಾದ ನಾಡು
ಪಂಪ ಕುಮಾರ ರಾಘವರುದಿಸಿದ ತಾಯ್ನಾಡು

ಕಸ್ತೂರಿ ಕನ್ನಡದ ಕಂಪು ಹರಡಿಹ ನಾಡು
ಕುವೆಂಪು ಬೇಂದ್ರೆ ಮಾಸ್ತಿಯರ ತಾಯ್ನಾಡು
ತಾಯಿ ಭುವನೇಶ್ವರಿಯು ನೆಲೆಸಿಹ ಸಿರಿನಾಡು
ಶಿಲ್ಪಕಲೆಗೆ ಹೆಸರಾದ ದೇವಾಲಯಗಳ ಗೂಡು
ಬೆಲೆ ಬಾಳುವ ಚಿನ್ನ ದೊರೆಯುವ ನಾಡು

ಋಷಿಗಳಾ ಕವಿಗಳಾ ವೀರ-ಶೂರರಾ ತಾಯ್ನಾಡು
ಹುಲಿ ಸಿಂಹ ಆನೆ ನವಿಲು ಸಾರಂಗದ ನೆಲೆವೀಡು
ತೇಗ ಗಂಧ ಆಲ ಬೇಲಗಳ ಹಸಿರು ಸಿರಿಯ ನಾಡು
ವಿಶ್ವ ವಿಖ್ಯಾತ ಜೋಗ ಜಲಪಾತದ ಸೊಬಗ ನಾಡು
ಕಲ್ಲುಕಲ್ಲಿನಲೂ  ವೈಭವವ ಹೊತ್ತ ಪುಣ್ಯದ ನಾಡು

ದೀಪಾವಳಿ

ಹೊಸ ಮನ್ವಂತರಕೆ ನಾಂದಿಯಾಗಲಿ ದೀಪ
ಕೊಳಯನೆಲ್ಲ ಸುಡಲಿ ಹಚ್ಚಿದ ದೀಪದ ತಾಪ
ಕೊನೆಯಾಗಲಿ ಜಗಕೆ ಅಂಟಿರುವ ಶಾಪ
ಮನೆ-ಮನಕೆ ಚೈತನ್ಯವ ತುಂಬಲಿ ದೀಪ

ಸಾಲು ಸಾಲಿನಲಿ ಹಚ್ಚುವ ನಾವು ಪ್ರಣತಿ
ಮರೆಯುವ ಎಲ್ಲ ಕಹಿ ನೋವಿನ ಸಂಗತಿ
ನಮ್ಮಯ ಗುರಿಯಾಗಲಿ ಕೇವಲ ಪ್ರಗತಿ
ನಿರತವೂ ಗೆಲುವಾಗಲಿ ನಮ್ಮಯ ಅತಿಥಿ

ಸಾಗುವ ಕತ್ತಲೆಯಿಂದ ಬೆಳಕಿನೆಡೆಗೆ
ಹೋಗುವ ಅಜ್ಞಾನದಿಂದ ಜ್ಞಾನದೆಡೆಗೆ
ದ್ವೇಷ ರೋಷ ಮರೆತು ಪ್ರೀತಿಯೆಡೆಗೆ
ಹರುಷವಾಗಲಿ ಈ ಹಬ್ಬದ ಕೊಡುಗೆ

ದೀಪದಿಂದ ದೀಪವ ಹಚ್ಚುವ ದೀಪಾವಳಿ
ಅಂಧಕಾರವು ಸರಿದು ಜ್ಞಾನ ನೆಲೆಯಾಗಲಿ
ಜೀವನವು ಸ್ಪೂರ್ತಿಯ ಸೆಲೆಯಾಗಲಿ
ದೈವದ ಹರಕೆಯು ನಮ್ಮ ಬಲವಾಗಲಿ

ಮೈಸೂರು ದಸರಾ

ದುರ್ಗೆಯಿಂದ ಮಹಿಷಾಸುರನ ಸಂಹಾರ
ಈ ದೇವಿಯ ಪೂಜಿಸುವ ಉತ್ಸವ ದಸರ
ವಿಧ ವಿಧವಾದ ಕಲಾ ವೈಭವದ ಹಂದರ
ನೋಡಲು ಬಲು ಆಕರ್ಷಕ, ಸುಂದರ

ನವ ಅವತಾರದಿ ದುರ್ಗೆಯು ಬರುವಳು
ನವ ವಿಧದ ಪೂಜೆಯ ಸ್ವೀಕರಿಸುವಳು
ಮಹಿಷಾಸುರಮರ್ದಿನಿ ಚಾಮುಂಡಿ ಇವಳು
ಲೋಕವ ಕಾಯುವ ದೇವತೆಯಾಗಿಹಳು

ಮೈಸೂರಿನಲಿ ಆನೆಯ ಮೇಲೆ ಅಂಬಾರಿ
ಗಾಂಭೀರ್ಯದಲಿ ಜಂಬೂ ಸವಾರಿ
ರಾಜಮನೆತನದವರ ಉಸ್ತುವಾರಿ
ಜನ ಸೇರುವರು ದಸರೆಗೆ ಮಿತಿಮೀರಿ

ಕಣ್ಮನ ಸೆಳೆಯುವ ದೀಪಾಲಂಕಾರವು
ಸಾಂಸ್ಕೃತಿಕ ಕಲೆಗಳಿಗಿದುವೇ ತಾಣವು
ದೇಶ-ವಿದೇಶದಲೂ ದಸರಾ ಪ್ರಸಿದ್ಧವು
ಕರ್ನಾಟಕದ ವೈಭವದ ನಾಡಹಬ್ಬವು

ಚಾಮುಂಡಿಬೆಟ್ಟದಲಿ ವಿಶೇಷ ಪೂಜೆಯು
ವೈಭವದಲಿ ತೇಲುವ ಅರಮನೆಯು
ಕಣ್ಮನವ ಸೆಳೆಯುವ ಹಬ್ಬ ದಸರೆಯು
ಇರಲಿ ಎಲ್ಲರ ಮೇಲೆ ದೇವಿಯ ಕೃಪೆಯು

ಕನ್ನಡ ಸೇವೆ

ಗೂಡು ಬಿಟ್ಟ ಹಕ್ಕಿಗಳು ನಾವು
ಗಡಿನಾಡ ಕನ್ನಡಿಗರು ನಾವು
ಕರುನಾಡು ನಮ್ಮ ತಾಯಿನಾಡು
ನಮ್ಮ ತಾಯಿನುಡಿ ಕನ್ನಡವು

ಕನ್ನಡಕೆಂದು ಚಿರಋಣಿಯು
ಗೈಯುವೆ ಸಾಹಿತ್ಯ ಸೇವೆಯನು
ಕನ್ನಡವೇ ನನ್ನುಸಿರು ನಿತ್ಯಹಸಿರು
ಕನ್ನಡ ಭಾಷೆ ಎನಗೆ ಕಾಮಧೇನು

ಲಿಪಿಗಳ ರಾಣಿ ಕನ್ನಡ ಭಾಷೆಗೆ
ಹೃದಯಾಂತರಾಳದಾ ನಮನವು
ಅಭಿಜಾತ ಭಾಷೆ ಎಂಬ ಗೌರವವು
ಕನ್ನಡ ಮಾತನಾಡುವ ಅನುದಿನವು

ಕನ್ನಡವನೇ ನುಡಿವೆ ಕೊನೆವರೆಗೆ
ಕನ್ನಡದಲೇ ನನ್ನಯ ಬರವಣಿಗೆ
ಕನ್ನಡವೇ ಭಾವದುಸಿರು ಎನಗೆ
ಕನ್ನಡಕಾಗಿ ಬದುಕು ಕೊನೆವರೆಗೆ

ಸಮಯದ ಮಹತ್ವ

 

ಮುತ್ತಿಗಿಂತ ಹೊತ್ತು ಉತ್ತಮ
ಅರಿತರೆ ಜೀವನ ಸುಗಮ
ಕೂತು ಕಳೆಯಬೇಡ ಹೊತ್ತು
ಬರುವುದು ದೊಡ್ಡ ವಿಪತ್ತು...

ಕಳೆಯ ಸಮಯ ಬರದು
ತಿರುಗಿ ಮತ್ತೆ ಎಂದೆಂದೂ
ಹಣಕೆ ಸಿಗುವುದು ಮುತ್ತು
ಹಣಕೂ ಸಿಗದ ವಸ್ತು ಹೊತ್ತು...

ಮೂರೇ ದಿನ ಜೀವನವು
ಪ್ರತಿ ಕ್ಷಣವೂ ಅಮೂಲ್ಯವು
ಇರುವ ಸಮಯ ಬಳಸಿ
ನಡೆವ ಗುರಿಯ ಅರಸಿ...

ಸದ್ಭಳಕೆ ಮಾಡುವ ಸಮಯ
ಸಮಯ ತೋರದು ದಯ
ಹೊತ್ತಿಗಿದೆ ಅದರದೇ ಹಿರಿಮೆ
ತಿಳಿದವರಾರು ಮಹಿಮೆ

ಸಂವಿಧಾನ ಶಿಲ್ಪಿ

ಮಹಾರಾಷ್ಟ್ರದ ರತ್ನಾಗಿರಿಯಲಿ ಭೀಮನ ಜನನ
ಬಾಲ್ಯದಲೇ ತಾಯಿ ಭೀಮಾಬಾಯಿಯ ನಿಧನ
ಅತ್ತೆ ಮೀರಾಳ ಜೊತೆ ಬಡತನದಲೇ ಜೀವನ
ಇವರು ಅಸ್ಪೃಶ್ಯತೆಯ ವಿರುದ್ಧ ಸಾರಿದರು ಕದನ

ಪಡೆದರು ಅರ್ಥಶಾಸ್ತ್ರ, ರಾಜನೀತಿಯ ಪದವಿಯನು
ವಿದೇಶದಲಿ ಸಂಪಾದಿಸಿದರು ವಕೀಲಿ ವೃತ್ತಿಯನು
ಪಡೆದರು ಪರಿಶ್ರಮದಿ ಡಾಕ್ಟರೇಟ್ ಪದವಿಯನು
ಸ್ಥಾಪಿಸಿದರು ದಲಿತ ವರ್ಗದ ಕಲ್ಯಾಣ ಸಂಸ್ಥೆಯನು

ನೀಡಿದರು ಮನುಸ್ಮೃತಿ ಚಳುವಳಿಗೆ ಚಾಲನೆ
ಮಾಡಿದರು ಸಮಾನತೆಯ ಹಕ್ಕಿನ ಪ್ರತಿಪಾದನೆ
ಹೂಡಿದರು ಜಾತಿಪದ್ಧತಿಯ ವಿರುದ್ಧ ಪ್ರತಿಭಟನೆ
ಯಶಸ್ವಿಯಾಗಿ ಮಾಡಿದರು ಕಾರ್ಯಸಾಧನೆ

ಇವರು ಭಾರತದ ಮಹಾನ್ ಸಂವಿಧಾನ ಶಿಲ್ಪಿಯು
ಅಪಾರ ಜ್ಞಾನದ ಕಡಲು ಈ ಪುಸ್ತಕ ಪ್ರೇಮಿಯು
ಕೊನಯಲಿ ಶಾಂತಿಗಾಗಿ ಬೌದ್ಧ ಧರ್ಮಿಯಾದರು
ಇವರಿಗೆ ಭಾರತರತ್ನವನು ನೀಡಿ ಗೌರವಿಸಿದರು

ಮಹಾ ಮಾನವತಾವಾದಿ

ಭೀಮಾಬಾಯಿ ರಾಮಜೀಯ
ಸುತನು ಈ ಭೀಮನು
ಮಹಾರಾಷ್ಟ್ರ ರತ್ನಾಗಿರಿಯಲಿ
ಇವನು ಜನಿಸಿದನು

ಅಸ್ಪೃಶ್ಯತೆ ಬಡತನದಲೇ
ಬಾಲ್ಯವನು ಕಳೆದನು
ಎಂದಿಗೂ ಮೊದಲಿಗನು
ವಿದ್ಯೆಯಲಿ ಇವನು

ಅರ್ಥಶಾಸ್ತ್ರ ನ್ಯಾಯಶಾಸ್ತ್ರದಿ
ಪದವಿಯನು ಪಡೆದರು
ವಿದೇಶದಲಿ ಕಾನೂನು
ಅಭ್ಯಾಸವನು ಮಾಡಿದರು

ಭಾರತದ ಸಂವಿಧಾನದ
ಶಿಲ್ಪಿಯು ಇವರಾದರು
ಅಸ್ಪೃಶ್ಯತೆಯ ವಿರುದ್ಧ
ಸಮರವನು ಸಾರಿದರು

ಮಹಾ ಮಾನವತಾವಾದಿ
ಪುಸ್ತಕಗಳ ಪ್ರೇಮಿಯು
ಭಾರತರತ್ನ ಪುರಸ್ಕೃತರು
ಬುದ್ಧನ ಅನುಯಾಯಿಯು

ವೀರ ವನಿತೆ ಓಬವ್ವ

 
ಗಂಡುಮೆಟ್ಟಿದ ನಾಡು ಚಿತ್ರದುರ್ಗವು
ಅಲ್ಲಿಹ ಬಲಿಷ್ಠ ಕಲ್ಲಿನ ಕೋಟೆಯು
ವೀರ ಮದಕರಿ ನಾಯಕನು ಆಳಿದ
ಹಸಿರ ನಡುವಿನ ಉಕ್ಕಿನ ಕೋಟೆಯು

ಕೋಟೆಯ ಕಾವಲಿಗೆ ಇರುವನು
ಶೂರನಾದ ಮದ್ದ ಹನುಮಪ್ಪನು
ಇವನು ಊಟಕೆ ಮನೆಗೆ ಬಂದನು
ಇವನ ಹೆಂಡತಿಯು ಓಬವ್ವನು

ಮನೆಯಲಿ ನೀರು ಮುಗಿದಿರಲು
ಓಬವ್ವ ನೀರಿಗಾಗಿ ಹೊರಟಳು
ಆಗಲೇ ಕಳ್ಳ ಗಿಂಡಿಯಲಿ ಸೈನಿಕರು
ನುಗ್ಗುವದನು ಅವಳು ನೋಡಿದಳು

ಒನಕೆ ಹಿಡಿದು ಅಲ್ಲಿಗೆ ನಡೆದಳು
ಒನಕೆಯಲಿ ತಲೆಯ ಜಜ್ಜಿ ಒಡೆದಳು
ಹೆಣಗಳ ಎಳೆದು ಬೀಸಾಡಿದಳು
ಹೈದರನ ಸೈನ್ಯವನು ಬಗ್ಗು ಬಡಿದಳು

ಊಟ ಮುಗಿಸಿ ಬಂದ ಕಾವಲುಗಾರನು
ರಕ್ತಸಿಕ್ತ ಹೆಂಡತಿಯ ನೋಡಿ ದಂಗಾದನು
ಕೊಡಲೇ ಕಹಳೆಯನು ಊದಿದನು
ಶತ್ರುಗಳ ಮಣಿಸಿ ಗಳಿಸಿದರು ಜಯವನು

ಇತಿಹಾಸದಿ ಹೆಸರಾದಳು ಒನಕೆ ಓಬವ್ವ
ಕರ್ನಾಟಕದ ವೀರ ವನಿತೆ ಓಬವ್ವಳು
ಶೌರ್ಯಕೆ ಮನೆ ಮಾತಾದಳು ನಮ್ಮವ್ವ
ಒನಕೆ ಓಬವ್ವನ ಕಿಂಡಿಗೆ ಹಚ್ಚ ಹಸಿರಾದಳು

ಕಸ್ತೂರಿ ಕನ್ನಡ

ಕಸ್ತೂರಿ ಕನ್ನಡವು ನಮ್ಮ ನುಡಿಯು
ಅಭಿಜಾತ ಭಾಷೆ ಎಂಬ ಹೆಮ್ಮೆಯು
ಆಗಿಹುದು ಇದು ಲಿಪಿಗಳ ರಾಣಿಯು
ಕರುನಾಡು ನಮ್ಮ ತಾಯಿ ಗುಡಿಯು

ಎನಿತು ನಮ್ಮ ನುಡಿಯು ಸೊಗವು
ಅತೀ ಮಧುರ ಕನ್ನಡ ಸ್ವರಾಕ್ಷರವು
ಕೋಗಿಲೆಯ ನದಿಯಂತೆ ಇಂಪು
ನಮ್ಮ ನುಡಿಯೇ ನಮ್ಮ ಬಲವು

ಬ್ರಾಹ್ಮಿ ಲಿಪಿಯಿಂದ ಉಗಮ ಕನ್ನಡವು
ಸಾವಿರದ ಐನೂರು ವರ್ಷದ ಇತಿಹಾಸವು
ಹಲ್ಮಿಡಿ ಕನ್ನಡದ ಮೊದಲ ಶಾಸನವು
ಎಂಟು ಜ್ಞಾನಪೀಠ ಪ್ರಶಸ್ತಿ ದೊರೆತಿಹವು

ಪಂಪ ಕುಮಾರವ್ಯಾಸರ ಕವಿಗಳ ಹಿರಿಮೆ
ಕುವೆಂಪು ಮಾಸ್ತಿ ಸಾಹಿತ್ಯದ ಗರಿಮೆ
ನವ ವಿಧದ ಸಾಹಿತ್ಯಕಿದು ಒಲುಮೆ
ಸಿರಿಗನ್ನಡವು ನಮ್ಮ ಭಾಷೆಯೆಂಬ ಹೆಮ್ಮೆ

ಆಧುನಿಕ ಜೀವನ

ಕೋಟಿ ರೂಪಾಯಿ ಕಾಂಕ್ರೀಟು
ಮನೆಗೆ ಒಡೆಯನು ನಾನು
ತುಂಬಿಹುದು ಬಗೆ ಬಗೆಯ
ಕಾರು, ಎಸಿ, ಸೋಫಾ, ಫ್ಯಾನು

ದುಬಾರಿ ಬೆಲೆಗೆ ಸಿಗುವುದು
ರಾಸಾಯನಿಕ ಮಿಶ್ರಿತ ನೀರು
ಗಾಳಿಯಲೂ ತುಂಬಿಹುದು
ಕಷ್ಮಲ ಶುದ್ಧವಿಲ್ಲವೂ ಚೂರು

ಆಧುನಿಕತೆಯ ಭರದಲಿ
ನಾಶವಾಗಿದೆ ಹಸಿರು
ಜನಜಂಗುಳಿಯ ನಗರ
ಕಲುಷಿತತೆಯ ತವರು

ಜೀವನವು ಆಗಿದೆ ಸರಳ
ಕವಲೊಡೆದ ದಾರಿ
ಬೆರಳ ತುದಿಯಲೇ ಬೇಕೆಲ್ಲ
ಜನರಾಗಿಹರು ಸೋಮಾರಿ

ಮನೆ ಕೆಳಗಿಳಿದರೆ
ಸಿಗುವುದು ಎಲ್ಲ
ಏನು ಮಾಡುವುದು
ನೆಮ್ಮದಿಯೇ ಇಲ್ಲ

ಕನ್ನಡ ನಾಡು

ಕಸ್ತೂರಿ ಕನ್ನಡವು ನಮ್ಮ ಭಾಷೆಯೆಂಬ ಹಿರಿಮೆ
ಕರುನಾಡು ನಮ್ಮ ತಾಯ್ನಾಡು ಎಂಬ ಗರಿಮೆ

ವಿವಿಧತೆಯಲಿ ಏಕತೆಯ ಸಾರುವ ನಾಡು
ಶ್ರೀಗಂಧ-ತೇಗ, ಖಗ-ಮೃಗಗಳ ಬೀಡು
ಸಪ್ತ ಜ್ಞಾನಪೀಠ ಕವಿಗಳಿಗಿದು ತಾಯ್ನಾಡು
ಪಂಪ ಕುಮಾರವ್ಯಾಸ ಉದಿಸಿಹ ನಾಡು

ತಾಯಿ ಕಾವೇರಿ ಉಗಮವಾದ ಪುಣ್ಯನಾಡು
ಕಾಮಧೇನು ಕಲ್ಪವೃಕ್ಷ ತುಂಬಿರುವ ನಾಡು
ಶಿಲೆ ಶಿಲೆಯಲೂ ಶಿಲ್ಪಕಲೆ ಅರಳಿದ ನಾಡು
ಗಂಗ-ಕದಂಬರಾಳಿದಂತ ವೈಭವದ ಗೂಡು

ಜೋಗ ಜಲಪಾತ ಧುಮ್ಮಿಕ್ಕಿದ ಸಿರಿನಾಡು
ವಿಶ್ವ ವಿಖ್ಯಾತ ಹಂಪಿ, ಬಾದಾಮಿಯ ನಾಡು
ಮೈಸೂರು ಅರಮನೆ, ಬೃಂದಾವನದ ನಾಡು
ಸಂಸ್ಕೃತಿ-ಸಂಸ್ಕಾರಗಳಿಗೆ ಇದುವೇ ಗೂಡು

ಕಡಲ ತೀರದ ಭಾರ್ಗವ

ಉಡುಪಿಯ ಕೋಟದ ಶಿವರಾಮ ಕಾರಂತರು
ನಡೆದಾಡುವ ವಿಶ್ವಕೋಶ ಆಗಿದ್ದರು ಇವರು
ಕಡಲ ತೀರದ ಭಾರ್ಗವ ಎಂದು ಪ್ರಸಿದ್ಧರು
ಪದ್ಮಭೂಷಣ ಪಂಪ ಪ್ರಶಸ್ತಿ ಪುರಸ್ಕೃತರು

ಕನ್ನಡ ಸಾಹಿತ್ಯ ಸಂಸ್ಕೃತಿಯ ವಕ್ತಾರ
ಪ್ರಸಿದ್ಧ ಕಾದಂಬರಿಕಾರ, ನಾಟಕಕಾರ
ವೈಜ್ಞಾನಿಕ ಲೇಖನಗಳ ಬರಹಗಾರ
ಜ್ಞಾನಪೀಠ ನಾಡೋಜದ ಪುರಸ್ಕಾರ

ಪರಿಸರ ಪ್ರೇಮಿ, ಹೋರಾಟಗಾರ ಇವರು
ಬಾಲವನದ ಕಾರಂತಜ್ಜ ಎಂದು ಪ್ರಸಿದ್ಧರು
ಸ್ವಾತಂತ್ರ್ಯ ಸಂಗ್ರಾಮದಲೂ ಇದೆ ಹೆಸರು
ವಿಶ್ವಕೋಶ ನಿಘಂಟುಗಳ ರಚನೆಕಾರರು

ಪ್ರಸಿದ್ಧ ಚೋಮನದುಡಿ, ಮೂಕಜ್ಜಿಯ ಕನಸು
ಚಲನಚಿತ್ರವಾಯ್ತು ಕಾದಂಬರಿ ಚಿಗುರಿದ ಕನಸು
ಇವರ ನಾಟಕಗಳು ಆಹಾ ಎಂತಹ ಸೊಗಸು
ಸೊರೆಗೊಂಡರು ಸಾಹಿತ್ಯ ಪ್ರೇಮಿಗಳ ಮನಸು

ಗುರು

ಚರಣ ಕಮಲಗಳಿಗೆ ವಂದನೆ
ಮಾಡದಿರುವೆ ಎಂದು ನಿಂದನೆ
ಜ್ಞಾನ ನೀಡಿ ನಮ್ಮನು ಕಾವನೆ
ಗುರುವೇ ದೇವನೆಂಬ ಭಾವನೆ

ಜ್ಞಾನ ಜ್ಯೋತಿಯನು ಬೆಳಗಿಸುವ
ಅಂಧಕಾರವ ದೂರ ಓಡಿಸುವ
ಅಕ್ಕರೆಯ ಕೊಡುವ ಗುರುವ
ನೀಡು ನೆನೆಯುವಂತ ಮನವ

ಹೊಮ್ಮಿಸಿ ಸುಜ್ಞಾನದ ಕಿರಣ
ತುಂಬಿಸಿ ಮೌಲ್ಯಗಳ ಸ್ಪುರಣ
ಹರಿಸಿ ನಿನ್ನಯ ಪ್ರೀತಿ ಕರುಣ
ಸ್ಪರ್ಶಮಣಿಯು ನಿನ್ನ ಚರಣ

ಶಿಲೆಯ ಆಗುವುದು ಶ್ರಮದೆ ಶಿಲ್ಪ
ಸಾಧನೆಗೆ ನೀಡುವೆ ಕಾಯಕಲ್ಪ
ಅಮರನಾಗುವನು ನಿನ್ನಿಂದ ಅಲ್ಪ
ನಿನಗಿಲ್ಲ ಬೇಧಭಾವವು ಸ್ವಲ್ಪ

ಆಹ್ವಾನ

ಹೆತ್ತ ತಂದೆ-ತಾಯಿಯರ
ಬಂಧನವ ಬಿಡಿಸಿ
ದುರುಳನಾದ ಕಂಸನ
ಸಂಹರಿಸಿದೆ ನೀ ಮುರಳಿ...

ನಿನಗೆ ಮೃತ್ಯುವಾಗಲು
ಬಂದ ರಾಕ್ಷಸಿ ಪೂತನಿಯ
ಮಗುವಾಗಿರುವಾಗಲೇ
ಕೊಂದೆ ನೀ ಶ್ಯಾಮ...

ಕೌರವ ಸಭೆಯಲಿ ದ್ರೌಪದಿಯ
ವಸ್ತ್ರಾಪಹರಣ ತಡೆದು
ಮಾನ ಉಳಿಸಿದ
ಮಹಾನುಭಾವ ನೀ ಕೃಷ್ಣ...

ಧರ್ಮ ರಕ್ಷಣೆಗಾಗಿ ಕರ್ಣನ
ಬಾಣದಿಂದ ಬಹು ಸೂಕ್ಷ್ಮದಿ
ಅರ್ಜುನನ ಪ್ರಾಣವನು
ಉಳಿಸಿದೆ ನೀ ಮಾಧವ..

ಈ ಕಲಿಯುಗದಿ ಮತ್ತೆ
ಅವತರಿಸಿ ಕಾಣದ ವಿಷಾಣುವಿನ
ಅಬ್ಬರವ ನಿಲ್ಲಿಸಿ ಮುಗ್ಧ ಜೀವಗಳ
ಉಳಿಸು ದುಷ್ಟ ಸಂಹಾರಿ ಮೋಹನ..

ಬಂಧಿ

ಕಾದು ಕುಳಿತಿಹೆ ನಾನು
ಆ ಶಬರಿಯಂತೆ
ಮನಕೆ ಮುದ ನೀಡಲು
ಬರುವೆ ನೀನೆಂದೂ...??

ಕಳೆದ ಆ ಮಧುಮಧುರ
ನೆನಪುಗಳಿಗೆ
ಮರು ಜೀವ ನೀಡುವ
ಕ್ಷಣವು ಬರುವುದೆಂದೂ...??

ಪಂಜರದ ಗಿಣಿಯಂತೆ
ಬಂಧಿ ನಾನಿಲ್ಲಿ
ಕಾಡುತಿಹ ಭಯವು
ಕೊನೆಯಾಗುವುದೆಂದೂ...??

ಪಾಂಡವರ ಬೇಗುದಿಗೂ
ಮಿಗಿಲಾದ ಈ
ಅಜ್ಞಾತವಾಸ ನನಗೆ
ಮುಗಿವ ಕ್ಷಣವೆಂದೂ...??

ಸೃಷ್ಟಿಯ ಸೊಬಗು

ದೇವನ ಅವಿಸ್ಮರಣೀಯ ಕಾಣಿಕೆ
ಹಸಿರ ಹಿರಿಯ ಈ ವನಮಾಲಿಕೆ
ಚೆಲುವಿನ ಸಿರಿಗಿಲ್ಲವೂ ಹೋಲಿಕೆ
ಚಿರಯೌವ್ವನದ ಸೊಬಗ ಕನ್ನಿಕೆ

ಪರಮ ಪಾವನವಾದ ಜಲವು
ಸ್ಥಿರತೆ ಸಾರುವ ಕಲ್ಲಿನ ಚೆಲುವು
ಮೆರಗು ನೀಡುತಿಹ ಕ್ಷಿತಿಜವು
ಮೈಮರೆತು ವೀಕ್ಷಿಸುವ ಮನವು

ಕೌತುಕವು ಸೃಷ್ಟಿಯ ವೈಚಿತ್ರ್ಯ
ಭುವಿ-ಭಾನಿನೊಳು ಸಾಮರಸ್ಯ
ಪ್ರಕೃತಿಯಿದು ಪುಣ್ಯ ಪಾವಿತ್ರ್ಯ
ರಸಿಕ ಕಂಗಳಿಗಿದೋ ಸ್ವಾತಂತ್ರ್ಯ

ಪದಗಳಿಗೆ ನಿಲುಕದ ಸೊಬಗು
ಹೊಂಬೆಳಕು ನೀಡಿದೆ ಮೆರಗು
ಮಾಧುರ್ಯವು ಹಕ್ಕಿಯ ಕೂಗು
ಮುತ್ತಿನ ಹನಿಗಳ ಬಿನ್ನಾಣ ಬೆಡಗು

ಪರಿವರ್ತನೆ

ಅಡಗಿ ಕುಳಿತಿಹೆವು ನಾವು
ಸೂಕ್ಷ್ಮಾಣು ಜೀವಿಗೆ ಹೆದರಿ
ಅಡಗಿ ಕುಳಿತಿಹೆವು ನಾವು...

ಸಂಬಂಧಗಳ ಮರೆತು
ಬಾಂಧವ್ಯಗಳ ಮರೆತು
ಹೆದರಿ ಕುಳಿತಿಹೆವು ನಾವು...

ಬೀದಿ ಬೀದಿಯ ಸುತ್ತದೇ
ಮಾಲ್ ಶಾಪಿಂಗ್ ಇಲ್ಲದೇ
ಹೆದರಿ ಕುಳಿತಿಹೆವು ನಾವು...

ಕಾಯಿಪಲ್ಲೆ, ಹಣ್ಣು ತರಕಾರಿ
ತರಲು ಹೋಗುತ್ತಿಲ್ಲ ಸವಾರಿ
ಹೆದರಿ ಕುಳಿತಿಹೆವು ನಾವು...

ಶವ ಸಂಸ್ಕಾರಕೂ ಹೆದರಿ
ಮಾನವೀಯತೆಯ ತೂರಿ
ಹೆದರಿ ಕುಳಿತಿಹೆವು ನಾವು...

ಓಡುತಿರುವ ಜಗವು ನಿಂತು
ಮುಂದಿನ ಹಾದಿ ಮರೆತು
ಹೆದರಿ ಕುಳಿತಿಹೆವು ನಾವು...

ತಮ್ಮ ಮನೆಗೆ ತಾವೇ ಬಂದು
ನಿಂದನೆಯ ಕೇಳಿ ನೊಂದು
ಹೆದರಿ ಕುಳಿತಿಹೆವು ನಾವು...

ಸೊಬಗಿನ ತವರು

ಹಸಿರು ಸೊಬಗಿನ ಸಿರಿಯ
ತೆಂಗು ಅಡಿಕೆಯ ಬೆಳೆಯ
ನಡುವಲಿಹುದು ನಮ್ಮೂರು

ಜುಳು ಜುಳು ಹರಿವ ನದಿಯ
ಹಸಿರು ದಿಬ್ಬದ ಕಣಿವೆಯ
ಬದಿಯಲಿಹುದು ನಮ್ಮೂರು

ನವಿಲಿನ ನರ್ತನದ ಸೊಗಡು
ಕೋಗಿಲೆಯ ಇಂಪಾದ ಹಾಡು
ತುಂಬಿರುವ ನಮ್ಮೂರು

ಸುಗುಣ ಸಂಸ್ಕೃತಿಯ ತವರು
ಸುಸಂಸ್ಕೃತರು ತುಂಬಿದ ಊರು
ಪುಣ್ಯಭೂಮಿಯು ನಮ್ಮೂರು

ಶಾಲ್ಮಲೆಯು ಹರಿಯುವಳು ಇಲ್ಲಿ
ಶಿವಗಂಗೆ ಜಲಪಾತ ಧುಮ್ಮಿಕ್ಕಿ ಚೆಲ್ಲಿ
ಕೈ ಬೀಸಿ ಕರೆಯುವ ನಮ್ಮೂರು

ಗುರುಮಾತೆ

ನನ್ನಯ ಮೊದಲ ಗುರುಮಾತೆ
ಅವಳು ನನಗೆ ಜನನಿಯಂತೆ
ತೋರಿದಳು ಪ್ರೀತಿ ಮಮತೆ
ವಿದ್ಯೆ ಕಲಿಸಿದ ಜ್ಞಾನದಾತೆ

ಅಕ್ಷರಮಾಲೆ ಕಲಿಸಿದವಳು
ತಪ್ಪು ತಿದ್ದಿ ಬೆಳೆಸಿದವಳು
ನೀತಿ ಕಥೆಯ ಹೇಳಿದವಳು
ಕರುಣೆಯ ಕಡಲು ಇವಳು

ಬಿದ್ದಾಗ ಕೈಹಿಡಿದು ಎತ್ತಿದವಳು
ನಾ ಗೆದ್ದಾಗ ಸಂಭ್ರಮಿಸಿದವಳು
ಊಟ ಮಾಡಿಸಿದ ತಾಯಿ ಇವಳು
ವಿಶಾಲ ಮಾತೃ ಹೃದಯದವಳು

ಪದಗಳಿಗೆ ನಿಲುಕದ ಶಕ್ತಿ ಇವಳು
ಮನಕೆ ಧೈರ್ಯ ತುಂಬಿದವಳು
ಜೀವನದ ದಾರಿ ತೋರಿದವಳು
ಸತ್ಯ ಮಾರ್ಗದಿ ನಡೆಸಿದವಳು

ಸಮಾರಂಭದ ಸಂಭ್ರಮ

ಕರೆ ನೀಡಿದೆ ಮಮತೆಯ ಕರೆಯೋಲೆ
ಸ್ವಾಗತಿಸುತಿದೆ ಮಾವಿನೆಲೆಯ ಮಾಲೆ
ಸಂಭ್ರಮಕೆ ಮೆರುಗು ನೀಡಿದೆ ಬಾಳೆ ಎಲೆ
ಕಣ್ಮನ ಸೆಳೆಯುತಿದೆ ಹೂ ಸಿಂಗಾರದ ಕಲೆ
ಎಲ್ಲೆಲ್ಲೂ ಹರಡಿದೆ ಚೆಲುವಿನಾ ಬಲೆ...

ಅತಿಥಿಗಳಿಗೆ ಕಾದಿದೆ ತಂಪು ಪಾನಕವು
ಘಮಘಮಿಸುತಿದೆ ಲಘು ಉಪಹಾರವು
ನಗು ಮೊಗದ ಮಾತಿನಾ ಸ್ವಾಗತವು
ಕಾಯುತಿದೆ ಮೆತ್ತನೆ ಸುಖಾಸನವು
ಸುತ್ತಲಿನ ಅಲಂಕಾರ ಚಿತ್ತಾಕರ್ಷಕವು...

ಮೊಳಗುತಿದೆ ಇಂಪಾದ ಮಂಗಳ ವಾದ್ಯವು
ರೇಷ್ಮೆ ಸೀರೆಯ ಮಾನಿನಿಯರ ಸೊಗವು
ಜೊತೆಗೆ ಬಂಗಾರದ ಆ ಆಭರಣದ ಲಾಸ್ಯವು
ಎಲ್ಲೆಡೆ ಕಾಣುತಿದೆ ಸವಿ ಸಂಭ್ರಮವು
ಸಭೆಯಲಿ ಗುಜು ಗುಜು ಮಾತಿನ ಸಡಗರವು...

ಹೊರ ಹೊಮ್ಮುತಿದೆ ಅಕ್ಷತೆಯ ರಂಗು
ಮೊಳಗುತಿದೆ ಮಧುರಗಾನದ ಗುಂಗು
ಮನ ಸೆಳೆಯುತಿದೆ ಬೆಳಕಿನಾ ಬೆಡಗು
ವರ್ಣನಾತೀತ ಶುಭಕಾರ್ಯದ ಸೊಬಗು
ಮಂತ್ರ ಶಾಸ್ತ್ರವು ಹೆಚ್ಚಿಸಿದೆ ಮೆರಗು...

ಬಾಕಿ ಉಳಿದಿದೆ ಇನ್ನೂ ಔತಣ ಕೂಟ
ಸಿದ್ಧವಾಗಿದೆ ಇದಕೆ ಹಸಿರು ತೋಟ
ಕೈ ಬೀಸಿ ಕರೆದಿದೆ ಬಾಳೆಲೆಯ ಊಟ
ಸಮಾರಂಭವಿನ್ನು ಇತಿಹಾಸದ ಪುಟ
ಸವಿ ನೆನಪಿಗಾಗಿ ಇರಲಿ ಒಂದು ಪಟ...

ಉಡುಗೊರೆಯ ಶಾಸ್ತ್ರ ಕೊನೆಯಲಿ
ಉಳಿಯಲಿ ಎಂದೆಂದೂ ನೆನಪಿನಲಿ
ಹರಸಿ ಹಾರೈಸಿ ಶುಭ ಕೋರಿಕೆಯಲಿ
ಹಂಚಿದ ಸಿಹಿ ಎಲ್ಲರ ಕರದಲಿ
ಕೊನೆಯಾಗುವುದು ನಿರ್ಗಮನದಲಿ..

ಕೆಚ್ಚೆದೆಯ ಕಲಿ ರಾಯಣ್ಣ

 

ಕ್ರಾಂತಿಕಾರಿ ವೀರ ಸಂಗೊಳ್ಳಿ ರಾಯಣ್ಣ
ಶೌರ್ಯ ಧೈರ್ಯವೇ ಇವನ ಮೈಬಣ್ಣ
ವೀರ ಸಿಪಾಯಿಗಳಿಗೆ ಇವನು ಅಣ್ಣ
ಅಗಸ್ಟ್ ಹದಿನೈದರಂದೆ ಜನಿಸಿದ ರಾಯಣ್ಣ

ಕೆಂಚಮ್ಮಾಜಿ, ಭರಮಪ್ಪನ ಮಗನಿವನು
ಸಂಗೊಳ್ಳಿಯ ವೀರ ಪುತ್ರ ಇವನು
ಕೆಚ್ಚೆದೆಯ ವೀರ ಶೂರ ಕಲಿ ಇವನು
ಬ್ರಿಟೀಷರೊಡನೆ ಹೋರಾಟಕೆ ನಿಂತನು

ಸ್ವಾತಂತ್ರ್ಯ ಸಮರದಿ ಪ್ರಮುಖ ಪಾತ್ರ
ಚೆನ್ನಮ್ಮನಿಗಾದ ಇವನು ವೀರ ಪುತ್ರ
ಹಿಡಿದನು ಸಂಗೊಳ್ಳಿ ಸಾಮ್ರಾಜ್ಯದ ಸೂತ್ರ
ಬ್ರಿಟೀಷರಿಗೆ ನೀಡಿದ ರಣಕೆ ಆಹ್ವಾನ ಪತ್ರ

ಸಾಧುವಿನ ವೇಷದಿ ಸೇರಿ ಸೆರೆಮನೆಯ
ಚೆನ್ನಮ್ಮಾಜಿಗೆ ನೀಡಿ ಭರವಸೆಯ
ಊದಿದನು ಸ್ವಾತಂತ್ರ್ಯದ ಕಹಳೆಯ
ಮುನ್ನಡೆಸಿದನು ಸಂಗೊಳ್ಳಿ ಸೇನೆಯ

ಬ್ರಿಟೀಷರ ಮೋಸಕೆ ಬಲಿಯಾದನು
ವೀರ ಮರಣಕೆ ಶರಣನಾದನು
ಇತಿಹಾಸದ ಪುಟವ ಸೇರಿದನು
ಸಂಗೊಳ್ಳಿ ಮರೆಯಲಾರದ ವೀರನು

ಶಾಸ್ತ್ರೀಜಿ

ಮೊಘಲ್ ಸರಾಯಿಯಲಿ ಜನಿಸಿದ ಈತ
ದಕ್ಷ-ಪ್ರಾಮಾಣಿಕನೆಂಬ ಮಾತು ಜನಜನಿತ
ಬಾಲ್ಯದಲಿ ಹಾಸಿ ಹೊದ್ದ ಬರಿಯ ಬಡತನ
ಬರಿಗಾಲಲೆ ನಡೆದು ಕಳೆದ ಬಾಲ್ಯದ ಜೀವನ

ಗಾಂಧಿಯಿಂದ ಆದನು ಇನನು ಪ್ರಭಾವಿತ
ಸ್ವಾತಂತ್ರ್ಯ ಹೋರಾಟಕೆ ಧುಮುಕಿದನೀತ
ಲಲಿತಾದೇವಿಯೊಂದಿಗೆ ಆಯಿತು ಮದುವೆ
ದೇಶ ಸೇವೆಗೈವ ದೃಢ ನಿರ್ಧಾರದ ನಡುವೆ

ನಾಯಕ ಬ್ರಿಟಿಷ ವಿರೋಧಿ ಚಳುವಳಿಗೆ
ಏಳು ವರ್ಷ ಕಳೆದ ಸೆರೆಮನೆಯೊಳಗೆ
ದೇಶಕೆ ಸಲ್ಲಿಸಿದ ಸೇವೆಯು ಅಪಾರ
ಇಂದಿಗೂ ಪ್ರಸಿದ್ಧ ಶಾಸ್ತ್ರೀ ಸೋಮವಾರ

ಸ್ವಾತಂತ್ರ ಭಾರತದ ಎರಡನೇ ಪ್ರಧಾನಿ
ಶಾಸ್ತ್ರೀ ಎಂಬ ಬಿರುದಾಂಕಿತ ಸ್ವಾಭಿಮಾನಿ
ಮರಣಾನಂತರ ದೊರೆಯಿತು ಭಾರತರತ್ನವು
ದೆಹಲಿಯಲಿ ಸ್ಮಾರಕ ನಿರ್ಮಿಸಿ ಸಮ್ಮಾನವು

ಗಾಂಧೀಜಿ-ಶಾಸ್ತ್ರೀಜಿ ಇಬ್ಬರನು ನೆನೆಯುವ
ಸಪರ್ಪಣಾ ಭಾವದ ರಾಜಕಾರಣಿಗೆ ನಮಿಸುವ
ಜೈ ಜವಾನ್ ಜೈ ಕಿಸಾನ್ ಇವರ ಧ್ಯೇಯವಾಕ್ಯ
ಇವರ ಕಾಲದಲಿ ದೇಶವು ಪ್ರಗತಿಯಲಿ ಔನತ್ಯ

ಜನಸಂಖ್ಯಾ ಸ್ಫೋಟ

ಜನಸಂಖ್ಯಾ ಸ್ಫೋಟ
ಜನಸಂಖ್ಯೆ ಕೋಟಿ ಕೋಟಿ
ಏರುತಿಹುದು ಮಿತಿ ದಾಟಿ
ಎಲ್ಲಡೆಯೂ ಪೈಪೋಟಿ
ಈ ಸಮಸ್ಯೆಗಿಲ್ಲ ಸಾಟಿ

ಎಲ್ಲಿ ನೋಡಿದರೂ ಜನರು
ಸೌಲಭ್ಯ ವಂಚಿತರ ತವರು
ಹಬ್ಬಿದೆ ಸಮಸ್ಯೆಯ ಬೇರು
ಸಿಗುತಿಲ್ಲ ಜನರಿಗೆ ಅನ್ನ ನೀರು

ಶಿಕ್ಷಣದಿ ಇಲ್ಲ ಅವಕಾಶ
ಆರ್ಥಿಕ ಪ್ರಗತಿಯ ನಾಶ
ದೇಶದ ಅಭಿವೃದ್ಧಿ ವಿನಾಶ
ಬರಿದಾಗಿದೆ ದೇಶದ ಕೋಶ

ಮನೆಗೊಂದು ಮಗುವಿರಲಿ
ಮನೆ ತುಂಬ ನಗುವಿರಲಿ
ಮನೆ ಮನೆಯಲೂ ಇರಲಿ
ಜನಸಂಖ್ಯೆ ನಿಯಂತ್ರಣದಲಿ

ಮೂಡಿಸುವ ಎಲ್ಲರಲೂ ಜಾಗೃತಿ
ಹಳ್ಳಿ ನಗರದಲೂ ಹೇಳುವ ನೀತಿ
ಮೀರದಿರಲಿ ಜನಸಂಖ್ಯೆ ಮಿತಿ
ದೇಶದೆಲ್ಲೆಡೆ ಆಗಲಿ ಉನ್ನತಿ

ಬಂಡಾಯ ಕವನ

ಕಾರ್ಮಿಕ

ದುಡಿಯುತಿಹನು ಕೂಲಿಯಾಗಿ
ನೋವು-ದಣಿವನೆಲ್ಲ ನುಂಗಿ
ಕುಟುಂಬದ ಒಪ್ಪತ್ತಿನ ಊಟಕಾಗಿ
ಅಲ್ಲ ದುಡಿಮೆಯು ಶೋಕಿಗಾಗಿ

ದಿನವೂ ಬೆವರು ಹರಿಸುವ
ಕಂಬನಿಯನು ಸುರಿಸುವ
ಕಷ್ಟಗಳ ಹೊದ್ದು ಬದುಕುವ
ಬವಣೆಯಲೆ ಬೇಯುವ

ಕಾರ್ಮಿಕನ ಗೋಳ ಕೇಳುವರಿಲ್ಲ
ಇವನ ಶ್ರಮವನು ಬಲ್ಲವರಿಲ್ಲ
ಆಳುವವರ ದರ್ಪ ತಡೆವರಿಲ್ಲ
ದೌರ್ಜನ್ಯ ಮಿತಿ ಮೀರಿದೆಯಲ್ಲ

ದೇಶದ ಬೆನ್ನೆಲುಬು ಕಾರ್ಮಿಕರು
ಅವರು ನಮ್ಮಂತೆ ಮನುಜರು
ಆಗದಿರಲಿ ಅವಕಾಶ ವಂಚಿತರು
ಬದುಕಿ ಬಾಳಲಿ ನಮ್ಮಂತೆ ಇವರು

ಮುಂಜಾನೆಯ ಮಳೆ

ಮುತ್ತಿನ ಹನಿಗಾಗಿ ಕಾಯ್ವ ಇಳೆ
ಮುಂಜಾನೆಯ ಸೋನೆ ಮಳೆ
ತೊಳೆಯಿತೆಲ್ಲ ಇಳೆಯ ಕೊಳೆ
ಜನಿಸಿತಾಗ ಹಚ್ಚಹಸಿರ ಬೆಳೆ

ಹಸಿರ ಸೀರೆಯುಟ್ಟ ಭುವಿ
ನಾಚಿ ನೀರಾದಳು ಬರಲು ರವಿ
ಹೊಂಗಿರಣದ ಸ್ಪರ್ಶದ ಸವಿ
ಕೇಳುತಿದೆ ಪ್ರೇಮರಾಗದ ಪಲ್ಲವಿ

ಹಾಲಿನಂತೆ ಹರಿವ ನೀರ ಝರಿ
ಎಂಥ ಚಂದ ಭೂರಮೆಯ ಸಿರಿ
ತೆರೆದಂತಿದೆ ಸ್ವರ್ಗದ ದಾರಿ
ಅದಕೆ ನಿಲುಕದ ಸೊಬಗ ವೈಖರಿ

ಸಕಲ ಜೀವರಾಶಿಗಿದುವೆ ನೆಲೆ
ಅದ್ಭುತ ದೇವ ಸೃಷ್ಟಿಯ ಕಲೆ
ಬೆಳಗಿದುವೆ ಚೈತನ್ಯದ ಸೆಲೆ
ರಮ್ಯತೆಗೆ ಕಟ್ಟಲಾದೀತೆ ಬೆಲೆ??

ನಿಲ್ಲಲಿ ಶೋಷಣೆ

 ಬಂಡಾಯ ಕವನ

ಕಾರ್ಖಾನೆಯಲಿ ಬೆವರು ಹರಿಸಿ
ತೋಳ ಬಲವ ಬಂಡವಾಳವಾಗಿಸಿ
ಮೈಯ ಮೂಳೆಯನು ಸವೆಸಿ
ದುಡಿವ ನಮ್ಮ ಕಡೆ ಗಮನ ಹರಿಸಿ

ಅನ್ನ ಬಟ್ಟೆಗಾಗಿ ನಮ್ಮ ಶ್ರಮವೂ
ನಮ್ಮ ದುಡಿಮೆ ನಂಬಿಹ ಕುಟುಂಬವೂ
ಕೆಲಸ ಇಲ್ಲವಾದರೆ ಇಲ್ಲ ಊಟವೂ
ಶೋಕಿಗಾಗಿ ಅಲ್ಲ ನಮ್ಮ ಕೆಲಸವೂ

ನೀವು ಬೆಳೆಯಲು ಬೇಕು ನಾವುಗಳು
ನೀಡಿ ನಮಗೂ ನಮ್ಮ ಸೌಲಭ್ಯಗಳು
ಆಗಲಿ ಒಳ್ಳೆಯ ಬದಲಾವಣೆಗಳು
ದೂರಾಗಲಿ ಕಾರ್ಮಿಕರ ಬವಣೆಗಳು

ಬಡವರೆಂದು ಶೋಷಿಸದಿರಿ ನಮ್ಮನು
ನೀಡಿ ನಮಗೆ ನಮ್ಮಯ ಹಕ್ಕನು
ಜೊತೆಗೆ ನಮ್ಮ ಶ್ರಮಕೆ ಗೌರವವನು
ಹಸನುಗೊಳಿಸಿ ನಮ್ಮ ಬದುಕನು

ನವಪರ್ವ ಫೌಂಡೇಶನ್ : ಉತ್ತಮ ಸ್ಥಾನ 
27/07/2020

ಮನುಜ ಕುಲವೊಂದೆ

ಬಂಡಾಯ ಕವನ

ಕರಿಯರೆಂದು ಕೂಗಿ ಜರಿಯಬೇಡಿ
ಎಲ್ಲರೂ ಮನುಜರೇ ಮರೆಯಬೇಡಿ
ನಮಗೂ ಒಂದು ಬದುಕಿದೆ ಕಾಡಬೇಡಿ
ಎಲ್ಲೆಡೆಯೂ ಬೇಧ-ಭಾವ ಮಾಡಬೇಡಿ

ಕರಿಯ ಬಣ್ಣಕೂ ಇದೆ ಅದರದೆ ಬೆಲೆ
ಕರಿಯರಿಗೂ ಇದೆ ಅವರದೆ ಆದ ನೆಲೆ
ಕಿತ್ತುಕೊಳ್ಳಬೇಡಿ ನೀರು, ಅನ್ನದ ಒಲೆ
ದೇವನೊಬ್ಬ ನೋಡುತಿರುವ ಮೇಲೆ

ಶಾಶ್ವತವಲ್ಲ ಗಳಿಸಿದ ಹಣ ಸಂಪತ್ತು
ಬದಲಾಗುತಲಿಹುದು ಈ ಜಗತ್ತು 
ನಿಮ್ಮ ಸ್ಥಾನಕೂ ಬರಬಹುದು ಕುತ್ತು
ನಂಬಿ ಬದುಕುವವರು ನಾವು ನಿಯತ್ತು

ಬಣ್ಣದಲಿ ಹೆಚ್ಚುಗಾರಿಕೆ ಏನಿದೆ ಅಣ್ಣ 
ಜಗದ ಮನುಜರೆಲ್ಲ ಒಂದೇ ಅಣ್ಣ 
ನಮ್ಮಲಿ ಮೇಲು ಕೀಳು ಬೇಡ ಅಣ್ಣ 
ಎಲ್ಲರ ರಕ್ತದ ಬಣ್ಣ ಒಂದೇ ಅಣ್ಣ 

ನಮಗೂ ಬದುಕು ಬಿಡಿ ದಯಮಾಡಿ
ನಮ್ಮ ಅನ್ನವ ಕಿತ್ತು ಕಿತ್ತು ತಿನ್ನಬೇಡಿ
ನಮದೂ ಈ ಭೂಮಿ ಬದುಕಗೊಡಿ
ಹಕ್ಕು ಕಸಿದು ಸಮಾಧಿ ಮಾಡಬೇಡಿ

ನವಪರ್ವ ಫೌಂಡೇಶನ್ : ಉತ್ತಮ ಸ್ಥಾನ 
13/07/2020

ನವ ವಧು

ನವವಧು

ಹುಟ್ಟಿ ಬೆಳೆದಾ ಮನೆಯ ಬಿಟ್ಟು
ಒಡಹುಟ್ಟಿದವರನೂ ಬಿಟ್ಟು
ಜನ್ಮವಿತ್ತ ದೇವರುಗಳ ಬಿಟ್ಟು
ಒಡನಾಡಿಗಳನೆಲ್ಲ ಬಿಟ್ಟು

ಅಕ್ಕರೆಯ ಸೇರನು ಒದ್ದು ಬಂದಳು
ಸೊಸೆಯಾಗಿ ಹೊಸ ಮನೆ ಸೇರಿದಳು
ಮಡದಿಯೆಂಬ ಪಟ್ಟವ ಏರಿದಳು
ಹೊಸ ಕನಸಗಳ ಕಂಗಳಲಿ ಕಂಡಳು

ಅಲ್ಲಿ ಕೂತರೆ ಅತ್ತೆ ಏನೆನ್ನುವರು
ಇಲ್ಲಿ ನಿಂತರೆ ಮಾವ ಏನೆನ್ನುವರು
ಅಡಿಗೆಯೂ ಬಾರದು ಚೂರು-ಪಾರು
ಕ್ಷಣವೂ ನೆನಪಾಗುತಿಹುದು ತವರು

ಇನ್ನು ಹೇಗಿರುವನೋ ಪತಿರಾಯ
ಆಗುವನೆ ಇವನು ಮನದ ಇನಿಯ
ಆಷಾಢ ಬರಲು ಸೇರಿ ತೌರು ಮನೆಯ
ಹಾಡುತಲಿ ಕಹಿ ವಿರಹದಾ ಗೀತೆಯ

ಬರಲು ಶ್ರಾವಣ ಸೇರಿ ಪತಿಗೃಹವನು
ಪೂಜಿಸಿ ವರ ಮಹಾಲಕ್ಷ್ಮೀಯನು
ಬೇಡಿ ಸಂಸಾರ ಸುಖ, ಸಂತಾನವನು
ಸಾಮರಸ್ಯದಿ ಕೂಡಿ ಬಾಳು ಹಸನು

ನುಡಿ ನಮನ

ನುಡಿ-ನಮನ
ಕೆಚ್ಚೆದೆಯ ಯೋಧರಿಗೆ
ಎದೆಯಾಳದಿಂದ ನಮನಾ
ಸಮರದ ಕಲಿಗಳಿಗಿದೋ
ಅರ್ಪಿಸುವೆವು ವಂದನಾ...

ಪ್ರಾಣವನೆ ಪಣಕಿಟ್ಟು
ದೇಶವನು ಕಾಯುವರು
ಜನ್ಮಭೂಮಿ ರಕ್ಷಣೆಗೆ
ಕುಟುಂಬವನೇ ತೊರೆದರು...

ನಮ್ಮ ನೆಮ್ಮದಿಯ ಹೊಣೆಯ
ತಮ್ಮ ಹೆಗಲ ಮೇಲೆ ಹೊತ್ತರು
ಶತ್ರುವಿನೊಡನೆ ಸೆಣೆಸಾಡಿ
ಜಯಿಸಿ ಹರಿಸಿ ತಮ್ಮ ನೆತ್ತರು...

ನಮ್ಮ ಭರತ ಭೂಮಿಯ
ಹಮ್ಮೆಯ ವೀರ ಪುತ್ರರು
ಕಾಡು-ಮೇಡು ಲೆಕ್ಕಿಸದೇ
ಹೋರಾಟಕೆ ನಿಂತರು...

ಎಂದೆಂದಿಗೂ ಅಮರವಾಗಿದೆ
ಅವರ ತ್ಯಾಗ ಬಲಿದಾನವು
ಕೆಚ್ಚೆದೆಯ ವೀರರ ಶೌರ್ಯ
ಮಾತೃ ಭೂಮಿಗೆ ವರದಾನವು..

ಕಾರ್ಗಿಲ್ ವಿಜಯ ದಿವಸ
ಹೆಮ್ಮೆಯಿಂದ ಆಚರಿಸುವ
ಹುತಾತ್ಮ ಯೋಧರನು
ಗೌರವದಿ ಸಂಸ್ಮರಿಸುವ...

ಹೃದಯದಿಂದ ಹೊಮ್ಮಲಿ
ವೀರರಿಗೆ ಭಾವಾಂಜಲಿ
ಕರಮುಗಿದು ಶಿರಬಾಗಿ
ಸಮರ್ಪಿಸುವ ಶೃದ್ಧಾಂಜಲಿ...

ಆಸೆ

ಆಸೆ
ಬಾಳ ಕಡಲಲಿ ತೇಲಿ ಮೀಯುವ ಅರಸಂಚೆಯಾಗುವಾಸೆ
ಭುವಿಯ ಮೆರಗ ಹೆಚ್ಚಿಸುವ
ಹಸಿರ ಹೊದಿಕೆಯಾಗುವಾಸೆ

ಜುಳು ಜುಳು ಹರಿವ ನೀರಲಿ
ಮೀನಾಗಿ ಈಜುವಾಸೆ
ಬಾನ ರವಿಯ ಹೊಂಗಿರಣದಲಿ
ಸ್ಪುರಣ ಕಾಂತಿಯಾಗುವಾಸೆ

ಹಸುಕಂದನ ತುಟಿಯ ಮೇಲಿನ
ಕಿರು ನಗುವಾಗುವಾಸೆ
ಹಸಿರು ಚಿಗುರಿಲೆಯ ಮೇಲಿನ
ಮುತ್ತಿನ ಹನಿಯಾಗುವಾಸೆ

ಕಂಗೊಳಿಸುವ ತರುಲತೆಯಲಿ
ಸೌಗಂಧಿಕ ಪುಷ್ಪವಾಗುವಾಸೆ
ಬಾನೆತ್ತರಕೆ ಹಾರಿ ಕ್ಷಿತಿಜವದಲಿ
ಸೇರಿ ಬಣ್ಣದ ಹಕ್ಕಿಯಾಗುವಾಸೆ

ವೇದಾವತಿ ಭಟ್ಟ
ಮುಂಬೈ 

ಚುಟುಕು

ತನು
ತನುವ ಸೌಂದರ್ಯಕೆ ಸೋಲದಿರು
ಹೇ ಮರುಳು ಮನುಜ
ನಶಿಸುವುದು ಕಾಲ ಕಳೆದಂತೆ
ಇದು ಬಹಳ ಸಹಜ...

ಮನ
ಹೆಂಡತಿಯ ಮಾತ ಕೇಳಿ ಒಬ್ಬ
ತಾಯಿಗೆ ಕಟ್ಟಿದ ಪಟ್ಟ ಹುಚ್ಚಿ
ಮನದ ಮಾತ ಕೇಳದೇ ಮಾಡಿದ
ಅಪರಾಧ ಕೊನೆತನಕ ಕಾಡಿತ್ತು ಚುಚ್ಚಿ...

ಧನ
ಮಾಡಿದ ದಾನ ಧರ್ಮ
ಬರುವುದು ಕೊನೆಯಲಿ
ಕೂಡಿಟ್ಟ ಧನ ಇರುವುದು
ಕೇವಲ ಪೆಟ್ಟಿಗೆಯಲಿ...


*ಕನ್ನಡ ಸಾಂಸ್ಕೃತಿಕ ಕೇಂದ್ರ, ಕಲ್ಯಾಣ(ರಿ) -ಮಹಾರಾಷ್ಟ್ರ*🇮🇳 🇮🇳🇮🇳🇮🇳🇮🇳🇮🇳🇮🇳🇮🇳

ಕನ್ನಡ ಸಾಂಸ್ಕೃತಿಕ ಕೇಂದ್ರ, ಕಲ್ಯಾಣ (ರಿ )-ಮಹಾರಾಷ್ಟ್ರ ಇವರು *ಕುಣಿಗಲ್ ತಾ. ಲೇಖಕರ ಬಳಗ ಹಾಗೂ ತನ್ಮಯ್ ಗ್ರೂಪ್ಸ್ ನ ಸಹಯೋಗದಲ್ಲಿ ದಿ :20.06.2020ರಂದು ಅಂತರ್ ರಾಜ್ಯ ಮಟ್ಟದ ವಾಟ್ಸಪ್ *ಚುಟುಕು ಸ್ಪರ್ಧೆ* ಯಲ್ಲಿ "ಅತ್ಯುತ್ತಮ" ಸ್ಥಾನ ದೊರೆತು "ಅನರ್ಘ್ಯ ಚುಟುಕು ರತ್ನ" ಪ್ರಶಸ್ತಿ ಗೆ ಪಾತ್ರವಾಗಿದೆ.

ಕೋರಿಕೆ

ಪಟಪಟನೇ ಸುರಿವ ಮಳೆಯೇ
ತೊಳೆ ನೀ ಭುವಿಯ ಕೊಳೆಯ
ಭರಭರನೇ ಬೀಸುವ ಗಾಳಿಯೇ
ಹಾರಿಸು ನೀ ಎಲ್ಲ ಸಂಕಷ್ಟವ

ಗುಡುಗುಡು ಗುಡುವ ಗುಡುಗೇ
ಹೆದರಿ ಓಡಿಸು ವಿಷ ಜೀವಾಣುವ
ಪಕಪಕನೇ ಹೊಳೆವ ಕೋಲ್ಮಿಂಚೇ
ಓಡಿಸು ಜಗದ ಅಂಧಕಾರವ

ದಡಬಡನೇ ಬಡಿವ ಬರಸಿಡಿಲೇ
ಚೂರುಚೂರಾಗಿಸು ಅಹಂಕಾರ
ತಪ್ಪಿನ ಅರಿವು ಮಾಡು ಪ್ರಕೃತಿಯೇ
ತಾನೇ ಮೇಲೆಂದು ಮೆರೆವ ಮನುಜರ

ಓ ದೇವನೇ ಸಾಕು ಮಾಡು ಈ ನರಕ
ಕೊನೆಯಾಗಿಸು ಶೀತಲ ಸಮರ
ಉಳಿಸು ನೀ ಎಲ್ಲ ಮುಗ್ಧರ ಜೀವ
ಕೊನೆಯಾಗಿಸು ಈ ಮರಣ ಮೃದಂಗ

ಪಂಚಮ ವೇದಾ...

ಬಂಧಿ

ಕಾದು ಕುಳಿತಿಹೆ ನಾನು
ಆ ಶಬರಿಯಂತೆ
ಮನಕೆ ಮುದ ನೀಡಲು
ಬರುವೆ ನೀನೆಂದೂ...??

ಕಳೆದ ಆ ಮಧುಮಧುರ
ನೆನಪುಗಳಿಗೆ
ಮರು ಜೀವ ನೀಡುವ
ಕ್ಷಣವು ಬರುವುದೆಂದೂ...??

ಪಂಜರದ ಗಿಣಿಯಂತೆ
ಬಂಧಿ ನಾನಿಲ್ಲಿ
ಕಾಡುತಿಹ ಭಯವು
ಕೊನೆಯಾಗುವುದೆಂದೂ...??

ಪಾಂಡವರ ಬೇಗುದಿಗೂ
ಮಿಗಿಲಾದ ಈ
ಅಜ್ಞಾತವಾಸ ನನಗೆ
ಮುಗಿವ ಕ್ಷಣವೆಂದೂ...??

ಪರಿವರ್ತನೆ

ಅಡಗಿ ಕುಳಿತಿಹೆವು ನಾವು
ಸೂಕ್ಷ್ಮಾಣು ಜೀವಿಗೆ
ಹೆದರಿ ಕುಳಿತಿಹೆವು ನಾವು...

ಸಂಬಂಧಗಳ ಮರೆತು
ಬಾಂಧವ್ಯಗಳ ಮರೆತು
ಹೆದರಿ ಕುಳಿತಿಹೆವು ನಾವು...

ಬೀದಿ ಬೀದಿಯ ಸುತ್ತದೇ
ಮಾಲ್ ಶಾಪಿಂಗ್ ಇಲ್ಲದೇ
ಹೆದರಿ ಕುಳಿತಿಹೆವು ನಾವು...

ಕಾಯಿಪಲ್ಲೆ, ಹಣ್ಣು ತರಕಾರಿ
ತರಲು ಹೋಗುತ್ತಿಲ್ಲ ಸವಾರಿ
ಹೆದರಿ ಕುಳಿತಿಹೆವು ನಾವು...

ಶವ ಸಂಸ್ಕಾರಕೂ ಹೆದರಿ
ಮಾನವೀಯತೆಯ ತೂರಿ
ಹೆದರಿ ಕುಳಿತಿಹೆವು ನಾವು...

ಓಡುತಿರುವ ಜಗವು ನಿಂತು
ಮುಂದಿನ ಹಾದಿ ಮರೆತು
ಹೆದರಿ ಕುಳಿತಿಹೆವು ನಾವು...

ತಮ್ಮ ಮನೆಗೆ ತಾವೇ ಬಂದು
ನಿಂದನೆಯ ಕೇಳಿ ನೊಂದು
ಹೆದರಿ ಕುಳಿತಿಹೆವು ನಾವು...

ಪಂಚಮ ವೇದಾ....

ಆಹ್ವಾನ

ಹೆತ್ತ ತಂದೆ-ತಾಯಿಯರ
ಬಂಧನವ ಬಿಡಿಸಿ
ದುರುಳನಾದ ಕಂಸನ
ಸಂಹರಿಸಿದೆ ನೀ ಮುರಳಿ...

ನಿನಗೆ ಮೃತ್ಯುವಾಗಲು
ಬಂದ ರಾಕ್ಷಸಿ ಪೂತನಿಯ
ಮಗುವಾಗಿರುವಾಗಲೇ
ಕೊಂದೆ ನೀ ಶ್ಯಾಮ...

ಕೌರವ ಸಭೆಯಲಿ ದ್ರೌಪದಿಯ
ವಸ್ತ್ರಾಪಹರಣ ತಡೆದು
ಮಾನ ಉಳಿಸಿದ
ಮಹಾನುಭಾವ ನೀ ಕೃಷ್ಣ...

ಧರ್ಮ ರಕ್ಷಣೆಗಾಗಿ ಕರ್ಣನ
ಬಾಣದಿಂದ ಬಹು ಸೂಕ್ಷ್ಮದಿ
ಅರ್ಜುನನ ಪ್ರಾಣವನು
ಉಳಿಸಿದೆ ನೀ ಮಾಧವ..

ಈ ಕಲಿಯುಗದಿ ಮತ್ತೆ
ಅವತರಿಸಿ ಕಾಣದ ವಿಷಾಣುವಿನ
ಅಬ್ಬರವ ನಿಲ್ಲಿಸಿ ಮುಗ್ಧ ಜೀವಗಳ
ಉಳಿಸು ದುಷ್ಟ ಸಂಹಾರಿ ಮೋಹನ..

ಜೀವನ ಪಯಣ

ಅವರ ಜೊತೆ ಅವರಂತೆ

ಇವರ ಜೊತೆ ಇವರಂತೆ

ಅಲ್ಲಿಯದ ಅಲ್ಲಿ ಬಿಟ್ಟು 

ಇಲ್ಲಿಯದು ಇಲ್ಲೇ ಬಿಟ್ಟು

ಹೊಂದಿಕೊಂಡು ಹೋಗುವುದೇ

ಸುಗಮ ಜೀವನದ ಸೂತ್ರ...

ಅಹಂಕಾರ ಬದಿಗಿರಿಸಿ

ಮಾತ್ಸರ್ಯ ಹೊಡೆದೋಡಿಸಿ

ಚುಚ್ಚು ಮಾತುಗಳ ಕೇಳಿಯೂ ಕೇಳದಂತೆ

ದ್ವೇಷ-ರೋಷ ಬಳಿಯೂ ಸುಳಿಯದಂತೆ

ನಗುವಿನುತ್ತರ ನೀಡುತ ಸಾಗುವುದೇ

ನಮ್ಮ ನಿಮ್ಮೆಲ್ಲರ ಜೀವನದ ಪಾತ್ರ...

ನಾನೆಂಬ ಮಾಯೆಯ ಮರೆತು

ಎಲ್ಲರೊಡಗೂಡಿ ಬೆರೆತು

ಕೋಪತಾಪಗಳ ದೂರವಿರಿಸಿ

ಸಹಬಾಳ್ವೆಯ ಚಿತ್ತಾರ ಬಿಡಿಸಿ 

ಸಂತೋಷವ ಹಂಚುತಾ ಬಾಳುವಾ

ಈ ಬದುಕು ಬರೀ ನಾಲ್ಕು ದಿನ ಮಾತ್ರ...

ಬದುಕು ಸಾಗುವುದು ನದಿಯಂತೆ

ಇದು ಸುಖ-ದುಃಖಗಳ ಸಂತೆ

ಬೆಸೆಯುವುದು ಹೊಸ ನಂಟು

ಒಯ್ಯಲಾಗದು ಎಷ್ಟಿದ್ದರೂ ಗಂಟು

ಗಳಿಸಿದ ಜನರು ಮಾತ್ರ ಉಪಕಾರ 

ಸ್ಮರಿಸುತ್ತ ಬರುವರು ಕೊನೆಗೆ ಹತ್ತಿರ...

ಹನಿಗವನ 1

ಪ್ರಶ್ನಾರ್ಥಕ 

ಹಲವು ವೇಷ ಬದುಕಲು ಅಗತ್ಯ ಕೆಲವರಿಗೆ

ಶೋಕಿಗಾಗಿ ವೇಷ ಹಾಕುವ ಕರ್ಮ ಹಲವರಿಗೆ

ಅನ್ನವಿಲ್ಲದೇ ಪರಿತಪಿಸುವರು ಹಲವರು

ಬೆಲೆತೆತ್ತು ಅನ್ನ ಚೆಲ್ಲುವರು ಕೆಲವರು...

ಜೀವನ

ಬಾರದು ಮತ್ತೆ ಕಳೆದಿರುವ ಕ್ಷಣ

ಸವಿಯಬಹುದು ನೆನಪಿನ ಹೂರಣ

ಸಿಹಿ-ಕಹಿ ಎರಡೂ ಉಂಟು ಬದುಕಲಿ

ನೋವು-ನಲಿವೆಂಬ ಮುಖವು ಬಾಳಲಿ

ಬೇಸರಿಸದೆ ಸಂತಸದಿ ತಾ ಬದುಕಿ

ಬದುಕಕೊಟ್ಟರೆಲ್ಲರಿಗೂ  ಬಾಳು ಸುಖಕರ 

ನಿದ್ದೆ

ನಿದ್ದೆ ನಿದ್ದೆ ನಿದ್ದೆ ನಿದ್ದೆ 

ಪತಿರಾಯನಿಗೆ ಯಾವಾಗಲೂ ಇದ್ದಿದ್ದೆ

ಕೇಳಿದರೆ ನಿಮಗೆ ಯಾಕಿಷ್ಟು ನಿದ್ದೆ

ಬರುವ ಉತ್ತರ ನೋಡಿ...

ನಿನ್ನದು ರಾಮಾಯಣ ಯಾವಾಗಲೂ ಇದ್ದಿದ್ದೆ

ಪಾರಾಯಣ 

ಹಗಲಲಿ ಓದಿಸುವರು ದೇವಿ ಪಾರಾಯಣ

ರಾತ್ರಿ ಮಾಡುವರು ಹದಿಮೂರೆಲೆಯ ಪಾರಾಯಣ

ಬೆಳಿಗ್ಗೆ ಹೆಂಡತಿಯಿಂದ ಮಹಾಭಾರತ ರಾಮಾಯಣ 

ಜಪಭಜನೆ ಮಾಡುವರು ನಾರಾಯಣ ನಾರಾಯಣ 

 

ಮತ್ತದೇ ಮೌನ..

ಮನಸು ಮುಗಿಲೆತ್ತರಕೆ 

ಹಾರಿ ಸಂಭ್ರಮದಿ

ಮಿಂದೇಳುತಲಿದೆ..

     ಆದರೆ ಅದೇಕೋ ಮತ್ತದೇ ಮೌನ....

ಎಲ್ಲವೂ ಹಿತ ಮನಕೆ

ತಂಪಾದ ತಂಗಾಳಿಯಲಿ

ಓಲೈಸುತಿದೆ..

    ಆದರೆ ಅದೇಕೋ ಮತ್ತದೇ ಮೌನ....

ತುಂತುರು ಮಳೆಯ 

ಮಣ್ಣ ವಾಸನೆಯಲಿ

ಮನ ನರ್ತಿಸುತಿದೆ..

    ಆದರೆ ಅದೇಕೋ ಮತ್ತದೇ ಮೌನ....

ಹುಣ್ಣಿಮೆ ಬೆಳದಿಂಗಳಲಿ

ನೈದಿಲೆಯ ನೋಡಿ

ಮನ ಮುದಗೊಂಡಿದೆ..

    ಆದರೆ ಅದೇಕೋ ಮತ್ತದೇ ಮೌನ....

ಸಖನ ಸವಿ ನುಡಿಗೆ

ಖುಷಿಯ ಮೇರೆಮೀರಿ

ಮನ ಪುಳಕಿತವಾಗಿದೆ..

    ಆದರೆ ಅದೇಕೋ ಮತ್ತದೇ ಮೌನ....

ಬಾಳ ಪಯಣದಲಿ

ಕಹಿಯನೆಲ್ಲ ಹಿಂದಿಕ್ಕಿ

ಮನ ಸಿಹಿಯಾಗಿದೆ.. 

    ಆದರೆ ಅದೇಕೋ ಮತ್ತದೇ ಮೌನ....

ಒಲವ ಜಿನುಗಿ

ದ್ವೇಷ ಕರಗಿ

ಮನ ಹಸಿರಾಗಿದೆ.. 

   ಆದರೆ ಅದೇಕೋ ಮತ್ತದೇ ಮೌನ....

ಕಾರಣ ತಿಳಿದು

ತಿಳಿಯದೇ ಮನ

ಗೊಂದಲದ ಗೂಡಾಗಿದೆ..

    ಆದರೆ ಅದೇಕೋ ಮತ್ತದೇ ಮೌನ....